भांगरभूंय | प्रतिनिधी
पणजी : गोंयांत सध्या एक नवो फटींगपणाचो प्रकार मुखार आयला. व्हॉट्सॲपार बनावट येरादारी चलन धाडिल्ल्यान, ह्या चलन फटोवणुके सावन शिटूक रावपाची शिटकावणी गोंय पुलिसांनी दिल्या.
व्हाट्सॲपार फटींगपणाचे प्रकार वाडिल्ल्याचें दिसून येतांच पुलिसांनी खबरदारी म्हणून वयली शिटकावणी दिल्या. पुलिसांचे लोगो (Police logo) आनी फोटो वापरून व्हाट्सऍपार बनावट येरादारी चलन धाडटात. येरादारी पुलिसांनी अशा संदेशांतल्या खंयच्याय लिंकाचेर क्लिक करूं नाकात वा अटॅचमेंट डावनलोड करूं नाका अशी सुचवणी केल्या. हे विशीं पुलीस विभागान ट्विटराचेर पोस्ट करून म्हायती दिल्या. ‘फेक चलन अलर्ट!’च्या नांवा खाला फटोवपी, पुलिसांचो लोगो, फोटो वापरून व्हाट्सॲपार बनावट येरादारी चलन धाडटात. खंयच्याच लिंकाचेर क्लिक करूं नाकात वा तपशील शेअर करूं नाकात वा कसलीच फायल डावनलोड करूं नाकात, तशेंच अशें कितेंय दिसल्यार सोमती पुलिसां कडेन कागाळ करची, असो उलो गोंय पुलिसांनी मारला.
गोंय, महाराष्ट्र पुलिसांक टॅग
गोंय पुलीस आनी महाराष्ट्र पुलिसांक टॅग करून केल्ल्या एका सोशल मीडिया वापरकर्त्याचे कागाळी उपरांत ही शिटकावणी दिल्या. तांकां धा दिसांनी विंगड विंगड नंबरावेल्यान दोन बनावट चलन सुचवण्यो मेळ्ळ्यो. वापरकर्त्यांनी सांगलें, एके बनावट प्रोफायलींत महाराष्ट्र पुलिसांचो फोटो वापरला, जाल्यार दुसर्यान वैयक्तीक प्रतिमा वापरल्या. येरादारी पुलिसांनी लोकांक सतर्क रावपाचो आनी सगल्या चलनांचें वॅरिफिकेशन फकत अधिकृत सरकारी पोर्टला वरवीं करपाचो उलो मारला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
