भांगरभूंय | प्रतिनिधी
पणजी : ‘हर घर नल से जल’ अशी घोशणा गोंय सरकार दिता. पूण प्रत्यक्षांत टँकरूच चडश्या उदकाची पुरवण करतात, अशें चित्र दिसता. सध्या फक्त 26.54 टक्के गिरायकांकूच फावोशें उदक मेळटा, अशें स्पश्ट जालां. हाचोच अर्थ 73 टक्के गिरायकांक फावोशें उदक मेळना. सगल्या म्हालांतल्या चडश्या वाठारांनी वर्सूयभर टँकरा वरवीं उदका पुरवण करतात.
आमदार विजय सरदेसाय हांणी विचारिल्ल्या प्रस्नाक जाप दितना मुख्यमंत्री डॉ. प्रमोद सावंत हांणी दिल्ले लेखी जापेंतल्यान हें स्पश्ट जालां. गोंयाक सुमार 695 एमएलडी उदकाची गरज आसा. सरकार फक्त 633 एमएलडी उदकाची पुरवण करपाक शकता. ताका लागून 62 एमएलडी उदकाचो उणाव आशिल्ल्याचें दिसून येता.
24 वरां उदक दिवपाचो हांवेस आसलो तरीय उदका पुरवणेंतलें हें वास्तव ह्या हांवेसाक धपको दिवपी आसा. पियेवपाच्या उदकाचो उणाव आशिल्ल्यान ताचेर उपाय येवजण करचे खातीर गोंय सरकाराच्या पेयजल पुरवण खात्या वतीन टँकरांचो वापर करून तान भागयतात. बाराय म्हालांतल्या खूबशे गांवगिरे आनी कांय शार वाठारांनी टँकरां वरवीं उदकाची पुरवण करतात.
जानेवारी 2022 ते जून 2025 ह्या तीन वर्सांचो नियाळ घेतलो जाल्यार सत्तरी, फोंडें ह्या म्हालांतल्या गांवांक टँकरांतल्या उदकाचो आदार आशिल्ल्याचें दिसून आयलां.
साडेतीन वर्सांत टँकरांच्यो 1.44 लाख खेपो
लेखी जापेंत नमूद केल्ले प्रमाण, 12 म्हालांतल्या सुमार 130 गांवांनी दर म्हयन्याक सुमार 3400 टँकरांच्या माध्यमांतल्यान उदकाची पुरवण जाता. साडेतीन वर्सांत सुमार 1 लाख 44 हजार 605 टंकरांच्यो खेपो नोंद जाल्यात.
टँकरांचेर अवलंबून आशिल्ले गांव तिसवाडी : पणजी, ताळगांव, फोंडें : फोंडें शार, केरी, सावय-वेरें आनी हेर 30 गांव. बार्देस : आसगांव हणजूणें, कायसूव, काणका, सुकूर, साल्वादोर द मुद, पेन्ह द फ्रान्स, साळगांव, सांगोल्डें, रेईश-मागूश, मायणा-पिळर्ण, निर्ला सयत वट्ट 15 गांव. दिवचल : सांखळी शार, हरवळे, सुर्ला, कुडणें, पाळी-कोठंबी, साळ, मयें, वन म्हावळींगे, कारापूर, सर्वण, चोडणा लयत वट्ट 17 गांव. मुरगांव : वास्को, दाबोळी, मुरगांव मतदारसंघातले गांव. सांगें : नानुडे, सुळकर्णे सयत वट्ट 14 गांव. धारबांदोडें : दाबाळ, सांवड्डें, कुळे सयत वट्ट 5 गांव. पेडणें : पेडणें पालिका, कोरगांव, पालयें, हरमल सयत 25 गांव. वाळपय : शेळपें, ब्रम्हकरमळी, शिगांव, धावें, उस्तें, करंजोळ, सोनाळ, अडवय, वांते, हिवरे-बुद्रुक, झर्मे, होंडा सयत वट्ट 82 गांव. काणकोण : 6 गांव. केपें : 5 गांव.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
