भांगरभूंय | प्रतिनिधी
पणजी : गोंयांत पोशिल्ले सुणे घेवन येवपी पर्यटकांक सरकारा कडेन नोंदणी करप आनी अँटीरेबीज हॉटलायनी वरवीं लसीकरण रेकॉर्ड नोंद करप सक्तीचें केलां. शिमे पलतडच्यान जावपी संक्रमण आडावपा खातीर हो निर्णय घेतला. हे विशीं जारी केल्ल्या आधिसुचवणेंत, पशुसंवर्धन आनी पशुवैजकी सेवा संचालनालयान फाटल्या एका वर्सा सावन पोशिल्लीं सुणीं घेतिल्ल्यांक लसीकरण कार्ड दिवपाचें वा तांच्या सुणे, माजरांक लसीकरण करपाचे निर्देश दिल्यात. रेबीज विषाणूचो प्रवेश आडावपा खातीर हीं पावलां उबारल्यांत.
मे २०२१ वर्सा, गोंयांक गोंयांक ‘‘रेबीज नियंत्रीत वाठार’’ म्हणून घोशीत केला. रेबीजाक लागून मनशाक मरण येवंक नाशिल्लें. हाका लागून ही घोशणा केल्ली. त्याच वर्सा पर्यटकांक तांच्या जनावरांचें लसीकरण करप सक्तीचें केल्लें. अधिकार्यांनी दिल्ले म्हायती प्रमाण, जायते पर्यटक, विशेश म्हणल्यार गोंयांत दुसरें घर आशिल्ले, पोशिल्लीं जनावरां गोंयांत घेवन येतात. तांची नोंदणी जावंक ना आनी लसीकरणाचो कसलोच रेकॉर्ड ना. गोंयचे महाराष्ट्र आनी कर्नाटकाचे शिमेर आजूनय असुरक्षितताय आसा. दिवचल, पेडणें, काणकोण हेर म्हालांनी रेबीजाचे दुयेंती मेळ्ळे अशें अधिकार्यांनी सांगलें.
‘गोंयांत हाडिल्लीं सगलीं जनावरां, विशेश म्हळ्यार सुणे आनी मांजरांची नोंदणी करप सक्तीचें. फाटल्या एका वर्सांत वा आयले उपरांत तांचें लसीकरण जाल्लें आसपाक जाय आनी धनयान लसीकरण कार्ड वांगडा आसप गरजेचें. राज्यांत रेबीजाचो विशाणू येवचो न्हय.’’ हे खातीर सहकार्य करपाचो उलो विभागान मारलो. २०१७ सावन, गोंयांन मानवी रेबीजाच्या दुयेतींचेर नियंत्रण हाडलां. सेगीत तीन वर्सां विशाणूक लागून एकूय मरण येवंक नाशिल्ल्यान ‘‘रेबीज नियंत्रीत’’ दर्जो मेळयला. २०२३ वर्सा एक मरण आयिल्लें. मात, २०२४ वर्सा एकूय मरण येवंक ना आनी अंदूं आतां मेरेन एकूय मरण येवंक ना. आदले मुख्यमंत्री मनोहर पर्रीकार हांणी मिशन रेबीज वांगडा सामंजस्य करार केल्लो आनी राज्यभरांत पुराय लसीकरण आनी नसबंदी मोहीम सुरू केल्ली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
