गोंयांत पावसाचो सांवार; न्हंयांक हुंवार
भांगरभूंय | प्रतिनिधी
आयज पयली ते बारावेक सुटी; 7 दीस घसघशांचेर वचपाक बंदी
पणजी: गोंयांत फाटले दोन दीस पावसान खवदळ घालो. व्हड प्रमाणांत पडपी पावसाक लागून राज्यांतल्या कितल्याश्याच न्हंयांक हुंवार आयला. तशेंच कांय धरणां पुराय भरल्यांत, कांय पुराय भरपाचे वाटेर आसात. कितल्याश्याच लोकांच्या घरांनी उदक आयलें. तशेंच कितल्याश्याच सुवातांचेर पालसणां कोसळिल्ल्यान, तशेंच झाडां पडिल्ल्यान त्या-त्या वाठारांतल्या येरादारीचेर परिणाम जालो. मजगतीं, पावसाचो सांवार पळोवन मुख्यमंत्री डॉ. प्रमोद सावंत हांणी शिक्षण खात्याच्या तशेंच गोंय वेधशाळेच्या अधिकाऱ्यां बरोबर ताकतिकेन बसका घेवन पयली ते बारावी मेरेनच्या भुरग्यांक आयज सुटी दिवपाचो निर्णय जाहीर केलो. तशेंच, रानां मंत्री विश्वजीत राणे हांणी फुडले 7 दीस घसघशांचेर वचपाक बंदीचो आदेश जारी केलो.
शेनवारा व्हड प्रमाणांत पावस पडले उपरांत आयतारा फांतोडेर सावन पावसान पुराय राज्याक झोडून काडलो. कितल्याश्याच गांवांनी गटारां सारकीं उस्पूंक नाशिल्ल्यान, तशेंच कांय कडेन गटारांक हात लावंक नाशिल्ल्यान उदक तुंबून रस्त्यार पावलें, कांय जाणांच्या घरांनीय घुसलें. कांय कडेन घरांचेर तशेंच पार्क केल्ल्या गाडयांचेर झाडांचे खांदे पडून व्हड प्रमाणांत लुकसान जालें.
पाली शिवलींग घसघशार गेल्ल्या
40 लोकांक केले साल्वार
पाली सत्तरींतल्या पाली शिवलींग घसघशार गेल्ल्या 40 लोकांक उजो पालोवपी दळ आनी पुलिसांनी साल्वार केले. आयतार आशिल्ल्यान पिकनिकेक, मजा करपाक म्हूण थंय व्हड प्रमाणांत लोक गेल्ले. मात, पावसाचो नेट वाडिल्ल्यान तशेंच थंयचे न्हंयेक हुंवार आयिल्ल्यान थंय गेल्ल्यांक भायर येवपाक वाटूच उरूंक ना. निमाणें परिस्थिती हाताभायर वता म्हूण एकल्यान पुलिशेक कळयलें. म्हादय अभयारण्याचे कर्मचारी, वाळपय पुलीस आनी उजो पालोवपी दळाच्या जवानांनी, तशेंच कांय थळाव्यांनी सुमार अडेज वरां रॅस्क्यू ऑपरेशन करून सगल्यांक भायर काडले.
नानोडें दिवचले ‘थार’चो स्टंट, गेली व्हांवून
नानोडें दिवचले थार गाडयेंतल्यान हुंवार आयिल्ल्या रस्त्या वयल्यान वचपाचो स्टंट गाडी चलोवप्याचे आनी वांगडा बशिल्ल्या, व्हिडियो रील काडप्यांच्या आंगार शेकलो. हुंवारांतल्यान वाट काडीत वचपी थार गाडी रस्त्या वयल्यान व्हांवून सकयल गेली आनी एका झाडाक आडकली. थंय आशिल्ल्या दीपक वझेन दोरयेच्या आदारान गाडयेंतल्या चौगोकूय भायर काडले.
प्रशिक्षणा खातीर नेमिल्ल्या शिक्षकांक सुटी ना!
आयज उटंगाराचो पावस पडपाची शक्यताय आशिल्ल्यान नर्सरी ते बारावी मेरेनचे विद्यार्थी आनी शिक्षकांक सुटी आसा. मात, प्रशिक्षणा खातीर नेमिल्ल्या शिक्षकांक सुटी ना म्हूण शिक्षण संचालक शैलेश झिंगडे हांणी स्पश्ट केलां.
लायटीचे 60 खांबे मोडून पडले
मुळावे म्हायती प्रमाण पावसाक लागून राज्यांतले 60 लायटीचे खांबे मोडून पडल्यात. सत्तरी, सांगें, उसगांव हांगा खात्याचें चड लुकसाण जालां. सगल्या वाठारांनी वीज पुरवण सुरळीत करपाचे यत्न सुरू आसात म्हूण मुखेल वीज अभियंते स्टिफन फर्नांडीस हांणी सांगलें.
खोतीगांवांतल्या कांय गांवांचो संपर्क तुटलो
खोतीगांव नवरा हांगासरल्या पुलाचो अर्दो कट्टो कोसळ्ळो. एडा, नडकें आनी हेर कांय गावांचो संपर्क तुटलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
