गोंयांत पावसाचो विक्रम

भांगरभूंय | प्रतिनिधी

162 इंचा परस अदीक पावसाची नोंद

भांगरभूंय । प्रतिनिधी

पणजीः गोंयांत मान्सूनच्या पावसान अंदूं नवो विक्रम रचला. 1 जून ते 9 सप्टेंबराच्या सकाळीं 8.30 वरां मेरेन सरासरी 161.81 इंच पावसाची नोंद जाल्ली. दीसभरांत पडिल्ल्या पावसाक लागून तो आतां 162 इंचाच्या फुडें गेला. हे आदीं 2020 त सगळ्यांत चड 162 इंच पावसाची नोंद जाल्ली. जाल्यार 1961 त 160 इंच पावसाची नोंद जाल्ली.

गोंयांत पावसाची वर्सुकी सरासरी 129 इंच जाल्यार जून ते सप्टेंबर ह्या काळांत हंगामी सरासरी 113 इंच आसा. अंदूं पावसान हे दोनूय विक्रम आदींच मोडल्यात. हंगामी पावस सोंपपाक आनीक 20 दीस उरल्यात. ताका लागून वट्ट हंगामी आनी वर्सुकी पावसाची आंकडेवारी आनीक वाडपाची शक्यताय आसा. 24 वरांत गोंयांत सरासरी 1.39 इंच पावसाची नोंद जाली. ह्या काळांत केप्यां सगळ्यांत चड 1.77 इंच पावसाची नोंद जाल्या.

हवामान खात्यान दिल्ले म्हायती प्रमाण गोंयांत 10 आनी 11 सप्टेंबराक मध्यम स्वरुपाच्या पावसाची शक्यताय आसा. जाल्यार 12 आनी 13 सप्टेंबराक तुरळक पावसाची शक्यताय आसा.

सोमारा पणजे चडांत चड 30.4 जाल्यार उण्यांत उणे 24.8 अंश सेल्सियस तापमानाची नोंद जाली. मुरगांवांत चडांत चड 30.6 आनी उण्यांत उणें तापमान 24.4 अंश सेल्सियस आशिल्लें. फुडले पांच दीस चडांत चड तापमान 31 ते 32 अंश सेल्सियस मेरेन आसपाची शक्यताय आसा.

सांग्यार पावसाचो दोट्टी शेंकडो

वाळपय उपरांत सांग्यार लेगीत पावसान दोट्टी शेंकडो पुराय केला. 1 जून ते 9 सप्टेंबर मेरेन सांग्यार 201.11 इंच पावसाची नोंद जाल्या. हे आदीं 3 सप्टेंबराक वाळपय पावस 200 इंच हुपून मुखार गेल्लो.

1 ते 9 सप्टेंबर ह्या काळांत पडिल्लो पावस. (इंचांत)

वाळपय 209.37, सांगें 201.11, सांखळी 177.54, केपें 176.24, पेडणें 166.15, पोरणें गोंय 159.24, फोंडें 168.28, काणकोण 152.94, पणजी 149.02, मडगांव 148.27, म्हापशें 145.55, मुरगांव 140.85, दाबोळी 126.35.