गोंयांत पालेभाजयांचीं मोलां वाडलीं

भांगरभूंय | प्रतिनिधी

कर्नाटकांत, महाराष्ट्रांत पावस पडिल्ल्यान आवक उणीं

पणजी: कर्नाटक, महाराष्ट्रांत जाल्ल्या आडवेळ्या पावसाक लागून गोंयांत येवपी भाजयांची आवक थोडें प्रमाणांत उणी जाली. हाका लागून राज्यांत पालेभाजयांचीं मोलां वाडल्यांत. सोमारा पणजे बाजारांत मेथी 30 रु., शेपू 25 रु., पालक 20 जाल्यार कोथंबीर 30 रुपया एक चुडी ह्या मोलान विकताले. जाल्यार तांबडी भाजयेचें मोल 50 रुपयाक तीन चुडयो आशिल्लें. गिमाक लागून फुडले कांय दीस पालेभाजयांचीं मोलां वाडपाची शक्यताय आसा.

सोमारा पणजे बाजारांत बिन्स 240 रुपया कील आशिल्लो. मोटो लिंबू 10 रुपया जाल्यार ल्हान 8 रुपयाक एक अशे विकताले. मिरसांग 120 रुपया, ढब्बू मिरसांग 100 रुपया जाल्यार मटार 100 रुपया कील आशिल्लो. शेवगो 100 रु. जाल्यार भेंडो, दोडकां, कारातीं दरेकी 80 रुपया कील अशे विकताले. गाजर आनी काकडी 60 रुपया कील आशिल्ली. आलें 240 रुपया जाल्यार ल्हान लसूण 320 रुपया कील आशिल्लें.

सोमारा पणजे बाजारांत कांदो, बटाट दरेकी 40 रुपया कील जाल्यार टमाट 30 रुपया कील आशिल्लें. फलोत्पादन म्हामंडळाच्या गाड्यांचेर कांदो 20 रु. टमाट 29 रु. जाल्यार बटाट 38 रुपया कील आशिल्लो. जाल्यार भेंडो 20 रु. कोबी 28 रु. गाजर 38 रु. बिन्स 165 रु. मिरसांग 72 रुपया कील मोलान विकताले. जाल्यार फ्लॉवराचे मोल प्रती नग 32 रुपया आशिल्लें.

मानकुरलादाची आवक वाडली

पणजे बाजारांत मानकुराद आंब्याची आवक वाडिल्ल्यान मोल उणें जालां. मानकुराद आंबो आकाराचो 400 ते 800 रुपया डझन मोलान विकताले. जाल्यार हापूस आंबो 350 ते 450 रुपया डझन आशिल्लो.

तांतीं वाडलीं

गिमाचे फाटभुंयेर तांतयांच्या मोलांत वाड जाल्या. सोमारा पणजे बाजारांत तांतयांचें मोल 80 ते 85 रुपया डझन आशिल्लें. फाटल्या कांय म्हयन्यांत तांतयांच्या मोलांत सेगीत देंवती, चडटी जायत आसा.