भांगरभूंय | प्रतिनिधी
पणजी: फाटल्या पांच वर्सांत गोंयांतल्या विवीध मळा वेल्या रीण वितरणांत 13 हजार 175 कोटी रुपयांची वाड जाल्या. अर्थीक सर्वेक्षण अहवालांतल्यान ही म्हायती मेळ्ळ्या. तेप्रमाण 2021-22त सप्टेंबर 2022 अखेरेक गोंयांतल्यो विवीध बँको आनी लघू वित्तीय संस्थांनी 30 हजार 609 कोटींचें रीण वितरीत केल्लें. 2025-26 ह्या अर्थीक वर्सांत सप्टेंबर 2025 अखेरेक 43 हजार 784 कोटी रुपया रीण वितरीत केलें. पांच वर्सांत गोंयांतल्या रीण वितरणांत 43 टक्क्यांनी वाड जाली.
अहवाला प्रमाण अर्थीक वर्स 2022-23त 30 हजार 769 कोटी, 2023-24 त 35 हजार 729 कोटी, 2024-25त 39 हजार 630 कोटी रुपया रीण वितरीत केलें. वयल्या काळांत वट्ट वितरीत रिणां पैकीं 60.98 टक्के रीण राष्ट्रीयकृत बँकांनी दिलां. 29.76 टक्के रीण खाजगी बँकांनी, 8.83 टक्के सहकारी बँकांनी जाल्यार 0.43 टक्के रीण लघू वित्तीय संस्थांनी दिलां. राष्ट्रीयकृत बँकां मदीं स्टेट बँकेन सगल्यांत चड 10 हजार 853 कोटी रुपयांचें रीण दिलां. जाल्यार कॅनरा बँकेन 3197 कोटी रुपयांचें रीण दिलां.
खाजगी बँकांनी एचडीएफसी बँकेन 5192 कोटी रुपया जाल्यार आयसीआयसीआय बँकेन 2839 कोटी रुपया रीण दिलां. सहकार मळार गोंय राज्य सहकारी बँके वतीन सगल्यांत चड रीण दिलां.
गोंयांत एका वर्सांत बँकांचें रीण आनी ठेवींचे गुणोत्तर (सीटी रेशो) वाडलां. सप्टेंबर 2024 अखेरेक गोंयांतल्या बँकांचो सीडी रेशो 32.66 टक्के आशिल्लो. सप्टेंबर 2025 अखेरेक तो 1.02 टक्क्यांनी वाडून 33.68 टक्के जालो. ह्या वेळार राष्ट्रीयकृत बँक आनी लघू वित्तीय संस्थांचो सीडी रेशो वाडलो. जाल्यार खाजगी आनी सहकारी बँकांचो उणो जालो.
बँकेंतल्या ठेवींनी 36 हजार कोटींची वाड
अहवाला प्रमाण वयल्या पांच वर्सांच्या काळांत गोंयांतल्या विवीध बँक खात्यांतल्या ठेवींनी 36 हजार 370 कोटी रुपयांची वाड जाली. 30 सप्टेंबर 2021त गोंयांतल्या बँक खात्यांत 93 हजार 618 कोटी रुपयांच्यो ठेवी आशिल्ल्यो. 30 सप्टेंबर 2025त त्यो वाडून 1.29 लाख कोटी रुपया जाल्यो. पांच वर्सांत ठेवींचें प्रमाण 38.94 टक्क्यांनी वाडलां. सप्टेंबर 2025 अखेरेक एसबीआयंत सगल्यांत चड 26 हजार 528 कोटी, जाल्यार एचडीएफसी बँकेंत 15 हजार 620 कोटी जाल्यार राज्य सहकारी बँकेंत 2464.46 कोटी रुपयांच्यो ठेवी आशिल्ल्यो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
