भांगरभूंय | प्रतिनिधी
पर्यटकांचो आंकडो धादोसकायचो, पूण अपेक्षीत वेवसाय नाः वेवसायीक
भांगरभूंय । प्रतिनिधी
पणजीः अंदूं गोंयांत पर्यटनां खातीर व्हडलो विकेंड आशिल्लो. पूण अपेक्षे प्रमाण तसो थळाव्यांक वेवसाय जावंक ना. एकंदरीत पर्यटन वेवसाय बरो आसलो. फ्लायट फुल्ल आसल्यो, पूण पोरूंचे तुळेंत लांब विकेंडाक जसो वेवसाय जातलो तसो हे खेपे ना. ते भायर पर्यटन खात्यांची पावसाळी पर्यटन ही संकल्पना फ्लॉप थारली.
15 ऑगस्ट ते 19 ऑगस्ट पांच दीस सेगीत सुटयो आयल्यात. फक्त 16 ऑगस्ट सोडल्यार 15 ऑगस्ट बिरेस्तार स्वांतत्र्य दीस, 17 ऑगस्ट शेनवार आनी 18 ऑगस्ट आयतार सुटी आनी 19 ऑगस्ट रक्षाबंधन हो सप्तकाचो शेवट पांच दीस सुटयेंचो आशिल्ल्यान गोंयाक भेट दिवपी पर्यटकांची स्थिती कितें आसली हाचो एक नियाळ घेतला.
हे विशीं उलयतना टीटीएजीचे निलेश शहा हांणी सांगलें, गोंया वांगडाच हेर देशांतल्या आनी देशा भायल्या पर्यटन थळांनी आपलीं दारां उक्तीं केल्यांत. गोंया खातीर सर्त आतां वाडल्या देखून हे खेपे किंमतींत खूब उणाव जाला. गोंयांत हे खेपेय लांब विकेंड आयला, पूण चड फरक कांयच ना. पावस उणो जाल्ल्यान पर्यटक गोंयांत येवपाक लागल्यात. गोंयांत येवपीं विमानां चडशीं फुल्ल आसात. सगळीं स्टार हॉटेलां 80 टक्के बूक जाल्यांत. हॉटेलां आनी हेर गजालींचे दर वयर सकयल जायत आसात. पूण वेवसाय बरो चल्ला, अशें शहा हांणी सांगलें.
गोंय हें वर्सभर चलपी पर्यटन थळ. तातुंत सप्तकाच्या शेवटाक वाड पळोवपाक मेळटा. ह्या काळांत चडशे पर्यटक कॅसिनोंत वचपाक आनी पावस अणभवपाक येतात. उत्तर गोंयांत सदचे प्रमाण गर्दी चड आसा. दक्षीण गोंयाक फक्त कोर्पोरेट पर्यटना खातीर पसंती आसा आनी ते सप्तकाच्या शेवटाक जायना, अशी म्हायती शहा हांणी दिली.
ह्या सप्तकाच्या शेवटांक हॉटेलांनी पर्यटकांची संख्या कमी आसा. एकंदरीत पर्यटन वेवसाय आमकां बरो जाला, पूण फावो तसो जावंकना. हेरशीं 15 ऑगस्ट म्हणल्यार गेस्ट हावस, अपार्टमेंट, रिसोर्टां ओव्हरबूक जातालीं. रुमांचें भाडें दुपेट जातालें. पूण ह्या 15 ऑगस्टांक अशी परिस्थिती ना, अशें टूर ऑपरेटर फोंडू आश्वेकार हांणी सांगलें.
मॉन्सून पर्यटनाचेर सांगपाचें जाल्यार फक्त गोंयच्या न्हयांचेर पर्यटकांक भोंवडे खातीर व्हरतात. दुदसागर बंद आसा आनी हेर घसघसे आतांच खंय तरी उक्ते जाल्यात. रानांनी ट्रॅकींग करप आतांच चालू जाला. देखून ह्या टुरांक तितली मागणी ना, अशें आश्वेकार हांणी सांगलें.
जो सप्तकाचो शेवट आमी अपेक्षीत केल्लो तसो वेवसाय आमकां जावंक ना. पर्यटन वेवसाय बरो जाला, पूण खूब ल्हवू ल्हवू जाला. पयली गोंयाक कुटुंबां आनी जोडपी भेट दितालीं तीं आतां खूब उणीं जाल्यात आनी 70 टक्के आकवार तरणाटे गोंयाक आतां भेट दितात. ते आपल्या भितरच किते करतात आनी आमकां वेवसाय उणो जाला, अशी कागाळ उत्तर गोंय रेंट अ कॅब संघटणेचे उपाध्यक्ष नितेश चोडणकार हांणी केली. गोंयांत हे खेपे तशे बरे दर्जाचे पर्यटक येवंक ना देखून फावो तितलो बरे दर आमकां मेळूंक ना. कळगूटे- बागा सारकिल्ल्या वाठारांत बाबत दर्जाचो पर्यटक आयिल्लो. जाल्यार बऱ्या दर्जाचो पर्यटक हणजूणें, वागातोर, मोरजी ह्या सारिकिल्ल्या वाठारांनी गेलो. देखून थळाव्यांकूय तितलो वेवसाय जावंक ना, अशें चोडणकार हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
