भांगरभूंय | प्रतिनिधी
पणजीः पयलेच खेपे गोंयांत समान परिक्षा जाली जाचे खातीर सगल्या शाळांक एससीईआरटीन तयार केल्ली प्रस्नपत्रिका दिली. हाचे खातीर एससीईआरटीन 118 प्रस्नपत्रिका तयार केल्ल्यो.
निमाणें सगल्या यत्तां खातीर आनी सगल्या माध्यमां खातीर वट्ट 118 प्रस्नपत्रिका तयार करपाचें व्हडलें काम पुराय केलां. ह्यो प्रस्नपत्रिका सगळ्या शाळांनी वेळार पावोवप आनी उड्डाण पंगडांनी तांचेर देखरेख दवरपाची ह्यो सगळ्यो प्रक्रिया खूब आडमेळी आसून लेगीत येसस्वीपणान पुराय जाल्यो. खूब आडमेळी आसून लेगीत हें काम पुराय जालें अशें एससीईआरटीची संचालक मेघना शेटगांवकार हांणी सांगलें.
मजगतीं हो प्रयोग गोंयांत पयलेच खेपे केलो. हाका लागून शिकोवप आनी मूल्यमापन प्रक्रियेंत एकरूपताय आनी प्रमाणीकरण हाडपाक मजत जातली. ह्या उपक्रमांत वट्ट 1400 शाळा वांटेकार आसात अशें शेटगांवकार हांणी सांगलें.
एकेच प्रस्नपत्रिकेंत चूक
राष्ट्रीय शिक्षण धोरण चालीक लायले उपरांत गोंयांत तिसरी ते आठवी मेरेनच्या सगळ्या विद्यार्थ्यां खातीर समान सामायिक परिक्षा घेतली. गोंय राज्य शिक्षण संशोधन आनी प्रशिक्षण मंडळान (जीएससीईआरटी) प्रस्नपत्रिका तयार केल्यो. सगळ्या विद्यार्थ्यां खातीर एकाच वेळार परिक्षा घेवपाचो हो अभिनव उपक्रम येसस्वी जालो. 7 तारखेर सुरू जाल्लें परिक्षा सत्र 15 ऑक्टोबराक सोंपता.
मजगतीं, सवेची एक प्रस्नपत्रिका सध्या चुकीच्या पर्यायांक लागून व्हायरल जाता. संबंदीत प्रस्नपत्रिक एकाच शाळेंत धाडला अशें एससीईआरटीन स्पश्ट केलां. हेर सगळ्या शाळांक धाडिल्ल्या प्रस्नपत्रिकेंत चूक नाशिल्ली. एके शाळेक वेळापत्रका प्रमाण परिक्षा घेवंक मेळ्ळी ना, देखून तांकां धाडिल्ले एकाच प्रस्नपत्रिकेंत ही चूक उरली अशें एससीईआरटीच्या सूत्रांनी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
