भांगरभूंय | प्रतिनिधी
आयज ग्राम न्यायालयाचें वाळपय उक्तावण
भांगरभूंय । प्रतिनिधी
वाळपयः देशांतल्या न्यायालयाची प्रक्रिया जलद गतीन जावची हे खातीर ग्राम न्यायालयाची संकल्पना चालीक लावपाच्या दिश्टीकोनांतल्यान कांय वर्सां सावन यत्न चल्ल्यात. ताका अखेर येस आयलां. गोंयांत दोन कडेन ग्राम न्यायालयाची संकल्पना चालीक लागतली. तातूंतली एक उत्तर गोंयांतल्या वाळपय जाल्यार दुसरी दक्षीण गोंयांतल्या सांग्यार हाची वेवस्था केल्या.
वाळपयच्या ग्राम न्यायालयाचे प्रक्रियेचें उक्तावण शेनवारा 21 सप्टेंबराक सकाळीं 9 वरांचेर वाळपय नगरपालिकेचे प्रशासकीय इमारतींत जातलें. हे कार्यावलीक वाळपय प्रथम न्यायालयाचे दंडाधिकारी इर्शाद आगा हांचे हस्तुकीं जातलें. उक्तावण सुवाळ्याक सत्तरी वकील संघटणेचे अध्यक्ष अॅड. यशवंत गांवस हाजीर रावतले. ह्या वेळार ग्राम न्यायालय आनी कायदो सेवा हे खाला विशेश व्याख्यानाचें आयोजन केलां.
खूब खेपे झगडीं किजिलां जातात. जमनीचे वाद जातात. एकामेका आड कागाळी करतात. ह्या संबंदांतले गुन्यांव पुलीस स्टेशनाचेर नोंद करतात. ते उपरांत न्यायालयांत आरोपपत्र दाखल करतात. न्यायालयांत प्रकरण पावले उपरांत थंय निकाल लागा मेरेन खूब वर्सां वतात. न्यायालयांत तारखेर तारीख मेळटा. अश्या वेळार कागाळदार गैरहाजीर रावता वा आरोपी गैरहाजीर रावता. केन्ना केन्ना वकील गैरहाजीर रावता. ताका लागून ह्या प्रकरणाचो तपास करपाक खूब वेळ वता. खूबश्या प्रकरणांतले आरोपी वा कागाळदार भायर पडटात. अश्या वेळार प्रकरणाचो निकाल लागचे खातीर खूब वर्सां वतात. अश्या हे वाजेवणें प्रक्रियेंतल्यान लोकांक थाकाय मेळची, हे खातीर केंद्रीय कायदो मंत्रालयान न्यायालयाचें कामकाज गांवा मेरेन व्हरपाचो निर्णय घेतला. गोंयांत ताची अंमलबजावणी जातली. गोंयांत वट्ट दोन ग्राम न्यायालयाच्या माध्यमांतल्यान अशे तरेच्या प्रकरणांचो गांवांनी वचून न्याय निवाडो करतले.
मेळिल्ले म्हायती प्रमाण पयलेच खेपे गोंयांत अशे तरेची संकल्पना चालीक लायतले. हेरशी ही संकल्पना सुमार 10 वर्सां आदीं चालीक लागप गरजेचें आशिल्लें. मात ह्या खात्यांत काम करपी संबंदीत अधिकाऱ्यांनी ही गजाल गांभिर्यान घेवंक नाशिल्ल्यान ताका खुबूच कळाव जालो. सध्या ह्या खात्याचो अव्वलसचिवाचो कारभार पळोवपी अमीर परब हांणी हाका गती दिली. हे खातीर ही संकल्पनां प्रत्यक्षांत चालीक लागतली. ग्राम न्यायालय ही पुराय तरेन वेगळी अशी संकल्पना आसा. गांवांत वचून न्यायालयाचें कामकाज घेतले. वाळपय ताचें मुखेल कार्यालय आसतलें, अशें अमीर परब हांणी सांगलें.
नगरपालिकेक मेळटलो महसूल !
ग्राम न्यायालयाचें कार्यालय स्थापन करचे खातीर नगरपालिके कडेन सुमार 10 म्हयन्यां आदीं कबलात केल्या. ते प्रमाण नगरपालिकेक भाडें म्हणून दर म्हयन्याक 40 हजार रुपया मेळटलें. तातूंतल्यान नगरपालिकेचे तिजोरेंत म्हत्वाची भर पडत उरतली, अशें नगरपालिकेंतल्या गोपांनी सांगलें.
उक्तावण सुवाळ्यांत मानेस्तांचें मार्गदर्शन
उक्तावण सुवाळ्यांत कायदो सेवा हे संबंदांत अॅड. शिवाजी देसाय हे विशेश मार्गदर्शन करतले. तशेंच गोंयांतलो आदिवासी समासज हाचेर गोंय सरकाराच्या समाज कल्याण खात्याचे अधिकारी शशिकांत नार्वेंकार हे विशेश म्हायती दितले. आदिवासी समाजाक गोंयच्या समाज कल्याण खात्या वरवीं आशिल्ल्यो विवीध येवजण्यो हे संबंदांतली म्हायती खात्याचे अधिकारी भिंगो गांवस हे दितले, अशें आयोजकांनी स्पश्ट केलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
