भांगरभूंय | प्रतिनिधी
म्हापशें: गोंयांत नोकरे खातीर अयिल्ल्या उत्तराखंडच्या तरणाट्याक अनवळखी मनशांनी बडयिल्ल्याची घडणूक मुखार आयल्या. अंकुश रावत अशें त्या तरणाट्याचें नांव. ताचे कडल्यान फोन, घड्याळ, पयशां सयत बॅगेची चोरी करून दुबावितांनी पळ काडली. मजगतीं, हे विशींची कागाळ अंकुश हांणी म्हापशें पुलीस स्टेशनांत केल्या.
मेळिल्ले म्हायती प्रमाण, अंकुश रावत हो तरणाटो दोन दिसां पयलीं गोंयांत नोकरे खातीर आयिल्लो. रातच्या वेळार तो पणजेच्यान म्हापश्यां वटेन चलत येतना ४- ५ अनवळख्यांनी ताचे कडेन सिगरेट मागपाचें नाटक करून ताका बरोच बडयलो. ताचे कडेन आशिल्लो फोन, घड्याळ, पयशां सयत मोलादीक दाखले, परवाने आनी हेर सामान आशिल्लें बॅग घेवन त्या पांचूय जाणांनी थंयच्यान पळ काडलो.
अंकुश रावत हांचें १४ जानेवारीक लग्न जालां. नोकरेचे आशेन तो गोंयांत आयिल्लो. मात गोंयांत पावल दवरतकच ही घडणूक घडली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
