भांगरभूंय | प्रतिनिधी
पणजी : गोंयांत नुस्त्याचें प्रमाण वाडटा काय देंवता हाचेर सदांच चर्चा जायत आसता. हे विशीं मत्स्त्योद्योग खातें म्हणटा, नुस्त्याचें प्रमाण देंवना, हवामान, पर्यावरण, नुस्तेमारीची सांखळी बदलिल्ल्यान नुस्त्याचें चड-उणें प्रमाण जायतूच आसता. ट्रॉलर, बोटींचो वाडपी आंडो बेकायदेशीरपणान जावपी नुस्तेंमारी अश्या कारणांक लागून गोंयांत नुस्तेमारीचे प्रमाण देंवता अशें कांय नुस्तेंमार्यांचें म्हणणें आसा. नुस्तेंमार्यांचे पागेरांत बांगडे, तारले, टुना हे नुस्तें व्हड प्रमाणांत मेळटा. पापलेट, इसवण अश्या नुस्त्यांचें प्रमाण देंवता. नुस्तेंमारी खात्याचो आंकडोय हेंच सांगता.
दर्याञत केल्ल्या आंकडेवारींतल्यान फाटल्या धा वर्सांनी गोंयांत ११ लाख, ६२ हजार २३७ टन इतलें नुस्त्याचें उत्पादन मेळ्ळां. जानेवारी, २०१५ ते मार्च, २०१५ मेरेनची ही आकडेवारी.हे आकडेवारींत सगल्यां चड उत्पादन बांगड्यांचें, उपरांत ताल्ले आनी टुना नुस्त्याचें जावन आसा. धा वर्सांनी बांगड्यांचें उत्पादन ३,३८,०९३ टन, तारले २, ३८, ३५० टन, टुना नुस्तें १,०३, ५०५ इतलें टन मेळ्ळां.
धा वर्सांचे आंकडीवारींत पयल्या तीन वर्सांनी ताल्ल्यांचें उत्पादन बरें आशिल्लें. मात उपरांत हें प्रमाण देंविल्ल्याचें दिसता. इसवणाचें उत्पादन चिंता करपा सारकें आसा. धा वर्सांनी फकत २४, ६८९ इतलेंच इसवणाचें उत्पादन मेळ्ळां. सुंगटां ७१ हजार, १९० टन इतलीं मेळ्ळ्यां. माणकी २७ हजार, ६५६ टन, बाळे २६ हजार, ३४७ टन, गोबरो ८ हजार, ०७८ टन, वेल्ल्यो ५ हजार, ११४ टन, खांपी ३४ हजार, ८१९ टन, लेपो १९ हजार, ९०१ टन, मोरी ४ हजार, ५७१ टन, कल्ली २ हजार, ६३६ टन, दर्यांतल्यो कुल्ल्यो १३ हजार, ३८३ टन, दोडयारे २२ हजार, ११५ टन, सौंदाळे ७ हजार, ९३१ टन, चणक १ हजार, ४३४ टन इतलें नुस्त्याचें उत्पादन जाल्ल्याचें आकडेवारींत दाखयता.
हे विशीं कांय नुस्तेंमार्यां केन संवाद केलो तेन्ना तांतल्या कांय जाणांनी नांव नमूद करचें न्हय ही अट घालून सांगलें. गोंयांत नुस्त्याचो आंकडो देंवतूच आसा. ताचीं कारणांय तशीं आसात. ट्रॉलर, बोटींचो वाडपी आंकडो, एलईडी, ‘बुट्टोल’वरवीं करपी नुस्तेंमारी, ल्हारां येवपी हवामान, दर्यांत सेगीत निर्माण जावपी वादळ, घोग्यांनी पडपी पावस हाका लागून नुस्तें धरप कठीण वता.
मत्स्योद्योग खात्याची संचालक डॉ. शर्मिला मोंतेरो हांणी, गोंयांत नुस्तेंमारी उणी जावंक ना. वर्सभर मेळपी नुस्त्याचें प्रमाण देवूंक ना. मात ल्हारांचो हवामान, पर्यावरणांतले बदल, नुस्त्याची सांखळी अशे तरेन कांय विशिश्ट नुस्त्याचें प्रमाण उणे-चड जायतूच आसता. केन्ना बांगडे चड मेळटात, जाल्यार केन्ना ताल्ले. गोंयांत नुस्तें वेवसाय वाडचे खातीर जायते उपक्रम हातांत घेतात अशें तिणें सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
