गोंयांत नव्या पीएफ खात्यांचो आंकडो जालो उणो

भांगरभूंय | प्रतिनिधी

पणजी: पोरूं वर्साचे तुळेंत अंदूं गोंयांत नव्या कर्मचारी भविष्य निधी संघटणेच्या खात्यांचो आंकडो उणो जाला. एप्रील ते ऑक्टोबर 2023 ह्या काळांत गोंयांत वट्ट 47 हजार 346 नवी ईपीएफओ खातीं उक्तीं जालीं.

एप्रील ते ऑक्टोबर 2024 ह्या काळांत गोंयांतल्या नव्या खात्यांचो आंकडो 3,155 उणो जावन 44 हजार 191 जालो. हो डेटा केंद्रीय कामगार खात्याच्या ईपीएफओन जाहीर केला.

एप्रील ते ऑक्टोबर 2024 ह्या काळांत गोंयांत उक्तीं केल्ल्या ईपीएफ खात्यांतल्यान चडांत चड 12 हजार 859 खात्यांचो आंकडो (29.09 टक्के) 18 ते 21 वर्सां पिरायेच्या तरणाट्यांचो आशिल्लो. 22 ते 25 वर्सां पिरायेच्या गटांतल्या तरणाट्यां खातीर 12 हजार 292 (27.81 टक्के) ईपीएफ खातीं उक्तीं जालीं. हाचे भायर 26 ते 28 वर्सां पिरायेच्या गटांतले 5,822 (13.17 टक्के), 29 ते 35 वर्सां पिरायेच्या गटांतले 7,156 (16.19 टक्के) आनी 35 वर्सां वयर पिरायेच्या गटांतले 5,642 (12.76 टक्के) व्यक्तींची ईपीएफओ खातीं उगडलीं.

ईपीएफओन 2018-19 ते 2024-25 (ऑक्टोबराच्या निमाणे) ह्या काळांतलो आंकडो जाहीर केला. वयल्या काळांत 3 लाख 67 हजार 333 नवे कर्मचारी प्रॉव्हिडंट फंड असोसिएशन खातीं उक्तीं जाल्यांत. हातूंतले 1 लाख 22 हजार 76 म्हळ्यार 33.23 टक्के खातेंधारक 18 ते 21 वर्सां पिरायेच्या तरणाट्यांचे आशिल्ले. 2022-23 वित्तीय वर्सा सगळ्यांत चड 71 हजार 479 ईपीएफ खातीं उक्तीं जाल्यांत.

—————–

2018-19 वर्सा सगळ्यांत उणीं पीएफ खातीं

वयल्या काळांत गोंयांत 2018-19 वर्सा सगळ्यांत उणीं म्हणल्यार 33 हजार 175 ईपीएफ खातीं उक्तीं जालीं. 2019-20 वर्सा 44 हजार 632 आनी 2020-21 वर्सा 50 हजार 539 ईपीएफ खातीं उक्तीं जालीं.