भांगरभूंय | प्रतिनिधी
भांगरभूंय । प्रतिनिधी
पणजी : गोंयांत उणो जावपी खेळगड्यांचो आंकडो ल्हवू ल्हवू जाग्यार येता. गोंयच्या भारतीय खेळां प्राधिकरणाच्या केंद्रांनी विविध मळा वयल्या खेळांनी खेळगड्यांचो आंकडो 2023-24 त सामकोच देंविल्लो. आतां फाटल्या देड वर्सांत हो आंकडो वाडत चल्ला, अशी म्हायती केंद्रीय खेळां आनी युवा वेव्हार मंत्री डॉ. मनसुख मांडवीया हांणी दिल्या.
गोंय राज्यसभेचे खासदार सदानंद शेट तानावडे हांणी राज्यसभेंत विचारिल्ल्या लेखी प्रस्नाक केंद्रीय मंत्री मांडवीया हांणी जाप दिल्या. भारतीय खेळां प्राधिकरण (एसएआय) निधी हो प्रादेशीक केंद्राक दिता आनी गोंयचे एसएआय प्रशिक्षण केंद्र हें मुंबय प्रादेशिक केंद्रा खाला येता आनी एसएआय ह्या केंद्राक अंदूंच्या अर्थीक वर्सांत 45 कोटी रुपयांची अर्थसंकल्पी तरतूद जाल्या.
गोंयांत दोन एसएआय केंद्रां आसात. एक केंद्र पेडे- म्हापश्यां आसा. तातूंत फुटबॉल आनी जुडो खेळांचें प्रशिक्षण दिता जाल्यार दुसरें केंद्र फोंड्यां आसा. तातूंत एथलेटीक्स, बॉक्सींग, जुडो आनी कबड्डी हे खेळ शिकयतात. 2020- 21 ते 2025- 26 ह्या स वर्सां मजगतीं पेडे आनी फोंडें केंद्रांत 404 गोंयच्या भुरग्यांनी खेळां प्रशिक्षण घेतलां. हातूंत 55 टक्के म्हणल्यार 225 चलयो खेळगड्यांचो आस्पाव आसा. 2020- 21 त 86 खेळगड्यांनी प्रशिक्षण घेतिल्लें उपरांत नव्या खेळगड्यांचो आंकडो उणो जायत गेल्लो. 2023- 24 त हो आंकडो 49 खेळगड्यां मेरेन देंवलो. पूण 2024- 25 त नव्या खेळगड्यांनी वाड जावन हो आंकडो 62 मेरेन पावलो आनी अंदूं 2025- 26 त हो आंकडो आतां 67 मेरेन पावला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
