गोंयांत नवजात बाळकांचें लिंग प्रमाण देशांत सगळ्यांत चड

भांगरभूंय | प्रतिनिधी

पणजीः 2023-24 वित्तीय वर्सा गोंयांत नवजात बाळकांचें लिंग प्रमाण देशांत सगळ्यांत चड आशिल्लें. हाचो अर्थ वयल्या अर्थीक वर्सा गोंयांत जल्मल्ल्या दर हजार चल्या फाटल्यान 977 चलयो जल्माक आयल्यो. राष्ट्रीय सरासरी 930 आशिल्ली. ही म्हायती केंद्रीय बायलां आनी बाल विकास राज्य मंत्री सावित्री ठाकूर हांणी राज्यसभेंत लेखी जापेंत दिल्या. हे संबंदी खासदार जावेद अली खान हांणी अतारांकीत प्रस्न विचारिल्लो.

जापेंत दिल्लें म्हायती प्रमाण, केंद्र सरकारान दादल्यां फाटल्यान बायलांचें प्रमाण वाडोवपा खातीर आनी बायलांक शिक्षण दिवपा खातीर जानेवारी 2015 वर्सा ‘बेटी बचाओ बेटी पढाओ’ येवजण सुरू केल्ली. देशभरांतल्या नवजात बाळकांचें लिंग प्रमाण 2014-15 वर्सा 918 आशिल्लें. 2023-24 वर्सा वाडून 930 जालें. गोंयांत 2014-15 वर्सा राज्यांतल्या दर एक हजार चल्यां फाटल्यान 939 चलयो जल्माक आयल्यो. हो आंकडो 2023-24 वर्सा वाडून 977 जालें.

2023-24 वित्तीय वर्सा गोंया उपरांत त्रिपुरांत जल्माक येतना सगळ्यांत चड लिंग प्रमाण 973 आशिल्लें. हाचे उपरांत अरुणाचल प्रदेश (971), मिझोराम (964), केरळ (962), जम्मू-काश्मीर (955), आसाम (951), मेघालय (946), आनी अस्तंत बंगाल (945) आशिल्लें. देशांतलें सगळ्यांत उणें प्रमाण बिहारांत आशिल्लें. 2023-24 वर्सा हांगा जल्मल्ल्या दर हजार चल्या फाटल्यान 882 चलयो जल्माक आयल्यो. महाराष्ट्र (915), तेलंगणा (917), हरियाणा (917), पंजाब (925) ह्या राज्यांतल्या राष्ट्रीय सरासरी परस हें प्रमाण उणें आशिल्लें.

‘बेटी बचाओ बेटी पढाओ’ येवजणेंत सरकारी एजन्सी, मिडिया, नागरी समाज आनी सामान्य लोक सयत वेगवेगळे भागधारक एकठांय हाडल्यात. ही येवजण आतां राष्ट्रीय चळवळींत रुपांतरीत जाल्या. असंतुलीत लिंग प्रमाण आनी लिंग आदारीत भेदभाव हांचे संबंदीत समस्या पयस करपाचो हे चळवळीचो हेत आसा. चलयांक म्हत्व दिवन आनी तांचे हक्क आनी संदी सुनिश्चीत करून सांस्कृतीक बदल घडोवन हाडपाचीय गजाल अशें जापेंत नमूद केलां.

माध्यमीक शिक्षण घेवपी बायलां विद्यार्थ्यांनी वाड

‘बेटी बचाओ बेटी पढाओ’ येवजणे वरवीं चलयांक शिक्षण घेवपाक उर्बा दितलें अशें जापेंत नमूद केलां. हाका लागून फाटल्या धा वर्सांत चलयांचें शिक्षण वाडलां. देशांत माध्यमीक शिक्षण घेवपी चलयांची नोंदणी 2013-14 वर्सा 75.51 टक्क्यां वयल्यान 2023-24 वर्सा 78 टक्क्यां मेरेन वाडली. वयल्या काळांत गोंयांत हें प्रमाण 103.42 टक्क्यां वयल्यान 110.8 टक्क्यांनी वाडलें.