भांगरभूंय | प्रतिनिधी
मुख्यमंत्र्यांनी उक्तायली खर गरज
सगल्या पक्षांनी तेंको दिवपाची मागणी
सरकार सांबाळटा गोंयचो धर्मीक एकचार
भांगरभूंय । प्रतिनिधी
पणजी : उत्तर प्रदेशा सयत देशांतल्या हेर राज्यांनी जबदस्तीन करतात त्या धर्मांतरणा विरोधांत कायदो केला. सध्या गोंयांत अश्या कायद्याची गरज आसा. हाका काँग्रेसी सयत हेर विरोधी पक्षांनी तेंको दिवपाची गरज आसा, अशें मत मुख्यमंत्री डॉ. प्रमोद सावंत हांणी उक्तायलें. सोमारा विधानसभा अधिवेशनांत आमदार प्रेमेंद्र शेट हांणी हालींच गोंयांत उक्तडार आयिल्ल्या आयेशा उर्फ निक्की ह्या प्रकरणा विशीं उपस्थीत केल्ले लक्षवेधी सुचोवणेचेर ते उलयताले.
मुख्यमंत्र्यांनी सांगलें, ह्या प्रकरणांत उत्तर प्रदेशांत धर्मांतर करपाच्या प्रकरणांत चंगूर बाबा नांवाचे व्यक्तीक धरल्या. हे आदीं गोंयांत लेगीत धर्मांतर करपी एका बाबाक अटक केल्ली. ही व्यक्ती लोकांक बशीन घेवन वतालो. कांय दिसां आदीं गोंयांत लव्ह जिहाद प्रकरणां मुखार आयिल्लीं. तातूंत लव्ह जिहाद नाशिल्लाचो आरोप जालो तरीय जाणा जावन लक्ष्य करताले अशें उक्तें जाल्लें. हे विशींची आंकडेवारी बेगिनूच दितले.
सरकार गोंयांतलो धर्मीक एकचार इबाडचो ना हाची जतनाय घेता. गोंयांत आंतर धर्मीय लग्नां जातात. हिंदू धर्मांतलो क्रिस्तांव धर्मांतल्या वा मुस्लिमां वांगडा लग्न करतात. ही त्या जोडप्यांची वैयक्तीक इत्सा आसा. मात जबरदस्तीन वा पयशांचें वा हेर हांयसां दिवन धर्मांतर करचें न्हय. आयेशा उर्फ निक्की प्रकरणांत गोंय पुलीस आठ दिसां आदीं उत्तर प्रदेशा पुलिसांच्या संपर्कांत आशिल्ले. उत्तर प्रदेश पुलिसांक गरजेची ती म्हायती दिताले. ह्या प्रकरणांत फुडलो तपास चालू आसा, मात हे विशीं सध्या अदीक म्हायती दिवपाक मेळना, अशें मुख्यमंत्र्यान सांगलें.
ते आदीं प्रेमेंद्र शेट हांणी आयेशा प्रकरणाक लागून सामान्य लोकां मदीं भंय निर्माण जाला, अशें सांगलें. देशभरांत गुन्यांव घडटा आसतनाच आयेशा गोंयांत रावताली हाची म्हायती गोंय पुलिशेक कशी कळूंक ना, असोय प्रस्न तांणी उपस्थीत केलो.
गोंय हें गुन्यांवकारां खातीर सेफ बेस जाल्ल्याचो आरोप विजय सरदेसाय हांणी केलो. ह्या प्रकरणांत थळावें इंटिलिजंट अपेशी थारलां, अशेंय तांणी सांगलें. विरोधी पक्ष फुडाऱ्यांक पुलीस त्रास करतात, मात व्हड गुन्यांवां कडेन ताचें लक्ष आसना असो आरोप युरी आलेमांव हांणी केलो.
घर धनयांकूय अटक जावं येता
गोंय पुलिसांनी आतां मेरेन 66 हजार बिराडकारांची पडटाळणी केल्या. ही प्रक्रिया ऑनलायन पद्दतीन चालू दवरल्या. हाचे मुखार एकाद्या गुन्यांवांत बिराडकार सांपडलो जाल्यार ताच्या घर धनयाचेर लेगीत कारवाय करतले. आपल्या वाठारांत कोण रावता हाची म्हायती पंचायत, पंचांनी लेगीत दवरप गरजेचें आसा, अशें मुख्यमंत्री डॉ. प्रमोद सावंत हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
