भांगरभूंय | प्रतिनिधी
पणजी : गोंयांतल्या नाल्लाचें उत्पादन 7.54 टक्क्यांनी देंवलां, अशें शेतकी मंत्री रवी नायक हांणी विधानसभेंत दिल्ले लेकी जापेंत म्हणलां.
गोंयांतलें नाल्लांचें उत्पादन दिवपाचें दोन मुखेल कारणां म्हणल्यार माडाक लागपी कीड आनी दुसरें कारण म्हणल्यार रानवटी जनावरां कडल्यान जावपी नाल्लांची नासधूस, अशें नाल्लांचें विक्रते तशेंच उत्पादक उदय म्हांबरे हांणी सांगलें.
आदीं नाल्ल आंगान व्हड आनी सवाय मेळटालो, हे खातीर नाल्लाक चड मागणी आशिल्ली. गोंयांतल्या खंयच्याच घरांत नाल्ला बगर एकूय पदार्थ जायना. नाल्ल हो गोंयकारांचे जिणेंतलो वेगळो करपाक जायना असो भाग आसा.
गोंयांत आदीं नाल्लाच्यो दोन फामाद जाती आशिल्ल्यो. बाणावली आनी कळंगूट हे जातीचे नाल्ल चड सोय दिताले. ह्या दोनूय गांवांतल्यान व्हड प्रमाणांत नाल्लांचें उत्पादन जातालें. आतां शारीकरण जाल्ल्यान बाणावले तशेंच कळंगूटे माडां परस इमारतीच चड दिसतात. ताका लागून ह्या जातींचे नाल्ल आतां उण्यां प्रमाणांत मेळटात.
नाल्लांचें उत्पादन उणें जावपाचें एक म्हत्वाचें कारण म्हणल्यार माडाक लागपी कीड. गोंयांत माडाक दोन तरांची कीड लागता. रेडपाम आनी एरिओफायड मायट. ही कीड भाटांनी हल्लो करता आनी माडाचें सुमारा भायर लुकसाण करता. ही कीड 60 टक्क्यां मेरेन नाल्लाचें उत्पादन नश्ट करपाक शकता. एरिओफायड मायट ही कीड 2000 वर्सां सावन माडांक लागपाक लागल्या. फाटलीं 25 वर्सां हे कीडीक लागून नाल्लांचें उत्पादन देंवता. सरकारान हे कीडींचेर उपाय येवजण करून वखद तयार करचें. शेतीक खातें शेतकारांक आदारभूत मोल म्हूण एका नाल्ला पाटल्यान 15 रुपया दिता. जर नाल्लाचें मोल 40 रुपया जालें जाल्यार आदारभूत मोल दिवन लेगीत शेतकाराक कसलोच फायदो जायना, अशें म्हांबरे हांणी सांगलें.
गोंयांत नाल्लाचें उत्पादन उणें जावपा फाटलें आनीक एक कारण म्हणल्यार, गोंयांतले माड खूब आदले म्हणल्यार सुमार 70-80 वर्सां आदले आसात. ताका लागून त्या माडांक उणे नाल्ल लागतात. गोंयांतले कांय शेतकार अजून लेगीत त्याच माडांचेर अवलंबून आसात. नाल्लाचें उत्पादन उणें जावपाचें हें एक कारण आसा, अशें म्हांबरे हांणी सांगलें.
ह्या उत्पादनांत मेहनत आनी कश्टाचें काम आशिल्ल्यान आतांचे तरणाटे ह्या वेवसायांक येवपाक न्हयकार दितात. ताका लागून नाल्ल वेवसायिकांक गोंया भायले नाल्ल हाडचे पडटात, अशें म्हांबरे हांणी ‘भांगरभूंय’ कडेन उलयतना सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
