भांगरभूंय | प्रतिनिधी
पणजी : गोंयांत फाटल्या तीन वर्सां एका म्हयन्यांत सुणी चावपाचीं 38 हजार 197 घडणुकांची नोंद जाल्या. हाचोच अर्थ म्हयन्याक सरासरी 1053 जाल्यार दिसाक सरासरी 35 जाणांक सुणीं चावपाच्यो घडणुको घडणुको घडल्यात. गोंय सरकारान एकात्मीक भलायकी म्हायती पोर्टलाचेर ही म्हायती अपलोड केल्या. केंद्रीय पशू संवर्धन राज्य मंत्री एस. पी. सिंग बाघेल हांणी लोकसभेंत दिल्ले लेखी जापेंतल्यान ही म्हायती मेळ्ळ्या. हे विशीं खासदार हिबी इडेन हांणी हे विशीं प्रस्न विचारिल्लो.
जापेंत दिल्ले म्हायती प्रमाण, गोंयांत 2022 त सुणीं चावपाच्यो 8057 घडणुकांची नोंद जाली. 2023 त ही संख्या वाडून 11 हजार 904 जाली. जाल्यार 2024 त तातूंत आनीक भर पडून ती 17 हजार 236 जाली. जानेवारी 2025 ह्या एका म्हयन्यांत सुणी चावपाच्यो 1789 घडणुको घडल्यात. जानेवारी 2025 चो विचार केलो जाल्यार दिसाक सरासरी 58 जाणांक सुणीं चाविल्लीं. पुराय देशाचो विचार केलो जाल्यार 2022 त 21.89 लाख, 2023 त 30.52 लाख जाल्यार 2024 त 37.15 लाख घडणुकांची नोंद जाली.
वयल्या काळांत महाराष्ट्रांत सुणीं चावपाच्यो सगळ्यांत चड 14.06 लाख घडणुको घडल्यो. ते उपरांत तामीळनाडू (13.33 लाख), गुजरात (8.92 लाख) ह्या राज्यांनी सुणीं चावपाच्या घडणुकांची नोंद जाल्या.
केंद्र सरकार राष्ट्रीय रेबीज नियंत्रण प्रकल्पा खाला राज्य सरकाराक मजत करता. सुणीं वा हेर जनावर चावलें जाल्यार गरजेची भलायकी सुविधा राज्य सरकारा वरवीं दितात. रस्ताद सुण्यांचेर नियंत्रण हाडचे खातीर तांचें निर्बिजीकरण करतात, अशें जापेंत म्हणलां.
रेबिजाक लागून 126 जाणांक मरण
देशभरांत जानेवारी 2022 ते जानेवारी 2025 ह्या काळांत रेबिजाची लागण जाल्ल्या 126 जाणांक मरण आयलां. वयल्या काळांत महाराष्ट्रांत 35, कर्नाटकांत 12 जाल्यार तामीळनाडूंत 9 जाणांक रेबिजाक लागून मरण आयलां, अशें जापेंत म्हणलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
