गोंयांत दिसाक एके बायलेक कॅन्सराचें निदान

भांगरभूंय | प्रतिनिधी

म्हयन्याक 14 दुयेंतींक मरण; संवसारीक कॅन्सर दीस

पणजी: फाटल्या कांय वर्सांत गोंयांत कॅन्सराचे दुयेंती आनी ताका लागून जावपी मरणांचें प्रमाण वाडत आसा. गोंयांत 2021 ते 2025 ह्या पांच वर्सांच्या काळांत 1825 बायलांक थानाचें वा गर्भाशयाचें मूख वा बिजांडकोशाच्या (ओव्हरी) कॅन्सराचें निदान जाल्लें. हाचोच अर्थ वर्सांक सरासरी 365, म्हयन्याक सरासरी 30 म्हणल्यार दिसाक सरासरी एके बायलेक कॅन्सराचें निदान जालां. ह्या वेळार 854 दुयेंतींक मरण आयलां. म्हणल्यार म्हयन्याक सरासरी 14 बायलां दुयेंतींक कॅन्सरान मरण आयलां.

मेळिल्ले म्हायती प्रमाण फाटल्या पांच वर्सांत गोंयांत गर्भाशय आनी बिजांडकोशाचे तुळेन थानाच्या कॅन्सराचे दुयेंतींचें तशेंच मरणाचें प्रमाण चड आसा. गोंयांत थानाच्या कॅन्सराचे 2021त 253 दुयेंती सांपडिल्ले. जाल्यार 109 दुयेंतींक मरण आयिल्लें. 2022त 260 दुयेंती सांपडिल्ले. जाल्यार 112 दुयेंतींक मरण आयिल्लें. 2023त 268 दुयेंती सांपडिल्ले. जाल्यार 115 दुयेंतीक मरण आयिल्लें. 2024त 276 दुयेंती सांपडिल्ले. जाल्यार 119 दुयेंतींक मरण आयिल्लें. 2025त 278 दुयेंती सांपडिल्ले. जाल्यार 120 दुयेंतींक मरण आयिल्लें.

गोंयांत 2021 ते 2025 मजगतीं 276 दुयेंतीक गर्भाशयाच्या मुखाच्या कॅन्सराचें निदान जाल्लें. ह्या वेळार 149 दुयेंतींक मरण आयिल्लें. वर्सा प्रमाण पळयत जाल्यार 2021त 58, 2022त 56, 2023त 55, 2024त 53 जाल्यार 2025त 54 बायलांक ह्या प्रकारच्या कॅन्सराचें निदान जाल्लें. 2021 वर्सा गर्भाशयाच्या मुखाचो कॅन्सर जाल्ल्या 31 बायलांक मरण आयिल्लें. 2022त 30, 2023त 30, 2024त 29 जाल्यार 2025त 29 बायलांक मरण आयिल्लें.

पुराय देशाची आंकडेवारी पळयत जाल्यार वयल्या काळांत 11.42 लाख बायलांक थानाच्या, 3.90 लाख बायलांक गर्भाशयाच्या मुखाचो जाल्यार 2.37 लाख बायलांक ओव्हरीचो कॅन्सर जाल्लो. पांच वर्सांत देशांत थानाचो कॅन्सर जाल्ल्या 4.91 बायलांक मरण आयलें. जाल्यार गर्भाशयाच्या मुखाचो कॅन्सर जाल्ल्या 2.10 लाख आनी ओव्हरी कॅन्सर जाल्ल्या 1.45 लाख बायलांक मरण आयिल्लें. उत्तर प्रदेशांत, महाराष्ट्रांत कॅन्सराचें निदान तशेंच मरणाचें प्रमाण चड आशिल्लें. जाल्यार अरुणाचल प्रदेशांत, मेघालयांत हें प्रमाण उणें आशिल्लें.

ओव्हरी कॅन्सराचे 214 दुयेंती

मेळिल्ले म्हायती प्रमाण गोंयांत 2021 ते 2025 मजगतीं ओव्हरी कॅन्सराचे 214 दुयेंती सांपडिल्ले. हाचोच अर्थ वर्साक सरासरी 42 म्हणल्यार म्हयन्याक सरासरी 3 दुयेंती सांपडिल्ले. वयल्या काळांत ओव्हरी कॅन्सर जाल्ल्या 130 बायलांक मरण आयिल्लें.