गोंयांत दिव्यांग व्यक्तीची नोंदणी करपा खातीर जातलो सर्वेः फळदेसाय

भांगरभूंय | प्रतिनिधी

पणजीः दिव्यांग सशक्तीकरण खातें गोंयांत दिव्यांग व्यक्तींची नोंद करपा खातीर नवो सर्वे सुरू करतलें. दिव्यांग व्यक्तींचो एक डेटाबेस तयार करून तांची शिक्षणीक पात्रतायेची आनी कुशळटायाची नोंद दवरून अर्थीक नदरेन तांकां घटमूट करतले अशी म्हायती दिव्यांग सशक्तीकरण मंत्री सुभाष फळदेसाय हांणी दिली.

सचिवालयांत आपयिल्ले पत्रकार परिशदेंत मंत्री फळदेसाय उलयताले. ह्या वेळार गोंय दिव्यांग हक्क आयोगाचे अध्यक्ष गुरुप्रसाद पावसकार, सचीव ताहा हाजीक, दिव्यांग खात्याची संचालक वर्षा नायक आनी हेर मानेस्त हाजीर आशिल्ले.

दिव्यांग सशक्तीकरण खात्यान पुराय गोंयभर दिव्यांग व्यक्तीचो सर्वसमावेक्षक सर्वे करपाचें थारयलां. हो सर्वे करपा खातीर एजन्सीची नेमणूक करपा खातीर खात्यान टेंडर लेगीत काडलां. दिव्यांग सशक्तीकरण खात्याच्या मार्गदर्शनाच्या देखरेखे खाला प्रशिक्षीत कर्मचारी पंचायत आनी पालिका वाठारांत वचून प्रत्यक्ष भेट दिवन हो सर्वे करतले. अशे तरेचो सर्वे करपी गोंय हें देशांतलें पयलें राज्य अशें सुभाष फळदेसाय हांणी सांगलें.

सद्या 2011चे जनगणेंत केल्ल्या दिव्यांग्याच्या सर्वेक्षण डेटाचेर आमकां निंबून रावचें पडटा. हें सर्वेक्षण दिव्यांग व्यक्ती कायदो 1995च्या आदाराचेर जाल्लो आनी ह्या कायद्यांत फक्त 7 अपंगत्वाचो आस्पाव आशिल्लो. आतां दिव्यांग व्यक्ती हक्क कायदो 2016 अंमलात आयिल्ल्यान हाची व्याप्तीची विस्तार जावन 21 अपंगत्वाचो आस्पाव जाला. ह्या नव्या कायद्याच्या आदाराचेर हें सर्वेक्षण जातलें अशें फळदेसाय हांणी सांगलें.

दिव्यांग व्यक्तींचो सुदारीत आनी अचूक असो डेटाबेस तयार करून तांकां आस्पावन घेवपी धोरण तयार करून तांचे मेरेन सगल्यो येवजण्यो पावच्यो ह्या उपक्रमाचो हेत आसा. तशेंच दिव्यांग भुरग्यांची कुशळटाय आनी शैक्षणीक पात्रतायेची नोंद जातली. जर तांचे पात्रताये सारखी नोकरी आसत जाल्यार हे विशींची म्हायती तांचे मेरेन पावयतले. जेन्ना कर्मचारी घरा कणकणीं वतले तेन्ना लोकांनी खास करून पालकांनी संकोच करिनासतना आपल्या भुरग्यांची म्हायती दिवची, असो उलो फळदेसाय हांणी मारला.

जाल्यार गोंय दिव्यांग हक्क आयोगाचे अध्यक्ष गुरुप्रसाद पावसकार हांणी सांगलें की, कुशळटाय आनी शैक्षणीक पात्रतायेच्या आदाराचेर दिव्यांग व्यक्ती आपल्या घरा लागसार आपल्या वाठारांनी नोकरी मेळची हो ह्या सर्वेचो हेत आसा.

जर एखाद्या वाठारांत दिव्यांगा खातीर नोकरी राखीव आसा जाल्यार ते नोकरी खातीरची कुशळटाय आनी शैक्षणीक पात्रताय आशिल्ल्या दिव्यांग व्यक्तीचो सोद घेतले आनी म्हायती ताका कळीत करतले. देखून तांकां आपल्या घरा लागसारच नोकरी मेळटली आनी नोकरेचो सोद घेवपाक ताका पयस वच्चे पडचें ना अशें पावसकार हांणी सांगलें.