भांगरभूंय | प्रतिनिधी
पणजी : दिवाळीचे खरेदी खातीर शेनवारा पणजे सयत गोंयांतल्या विवीध बाजारांनी खूब गर्दी दिसताली. बाजारांत आकाशदिवे, पणट्यो, विद्यूत रोशणायेच्यो माळो, रांगोळी, नरकासूराचीं म्होवाळीं, कृत्रीम फुलांच्यो माळो, सोबेच्यो हेर वस्तू खरेदी खातीर लोकांची ताकतीक दिसताली. तशेंच गांवठी फोव, सादे फोव, कारिटां हांची खरेदी लेगीत लोक व्हड प्रमाणांत करताले. शेनवारा बाजार वाठारा सयत खूबश्या रस्त्यांचेर येरादारीची कोंयडी जाताली.
पणजी बाजारांत पोरूंचे तुळेंत विवीध वस्तूंच्या मोलांक मात्शी वाड जाल्या. तरी लेगीत खरेदीची उमेद कायम आशिल्ली. बाजारांत दिवाळेक गरजेचें आशिल्ले गांवठी फोव 120 ते 150 रुपया कील ह्या दरान मेळटाले. सादे फोव 70 रुपया कील आशिल्ले. कारिटां 30 रुपयांक पांच नग विकताले. आंबाडे 60 ते 100 रुपयांक 10 नग, बत्तासे 50 रुपयाक 6 आशिल्ले. बेसन लाडू 160 रुपया डझन ह्या दरान विकताले. रव्याचे लाडू 200 रुपया डझन मेळटाले.
बाजारांत आकाशदिव्यांचें मोल आकार तशेंच कलाकुसरी प्रमाण 200 ते 1 हजार रुपया मेरेन आशिल्लें. मातयेच्यो साद्यो पणट्यो 50 ते 80 रुपया डझन जाल्यार कलाकुसर केल्ल्यो पणट्यो 15 ते 40 रुपयांक एक नग मेळटालो. विद्यूत रोशणायेच्यो माळो 200 ते 1500 रुपयांक मेळटाल्यो. कृत्रीम फुलांच्यो माळो 30 ते 150 रुपयांक एक ह्या दरान विकताले. तशेंच शेनवारा बाजारांत मिटाय, भेटवस्तू, कपड्यांचे खरेदी खातीर गर्दी जाल्ली.
शारांत येरादारीची कोंयडी
शेनवारा सांतिनेज, 18 जून, एमजी रोड, आझाद मैदान वाठार, बांदोडकार रस्त्यार गाडयांच्यो रांको लागिल्ल्यो. मात खूबश्या वाठारांनी पुलीस आशिल्ले तरीय पार्किंगची वेवस्था नाशिल्ल्यान रस्त्यारूच गाडयो पार्क केल्ल्यो. ताका लागून येरादारी कोंयडेंत भर पडली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
