भांगरभूंय | प्रतिनिधी
पणजी : गोंयांत कुटुंब नियोजना खातीर बायलां आनी दादल्यांच्यो वेगवेगळे पद्दतीच्यो नसंबदीची शस्त्रक्रिया करतात. फाटल्या तीन वर्सांत गोंयांतल्या सरकारी हॉस्पिटलांत अश्यो वट्ट 5194 नसबंदी शस्त्रक्रिया केल्यात. तातूंतल्यो 5183 शस्त्रक्रिया (99.78 टक्के) बायलांच्यो आशिल्ल्यो जाल्यार फक्त 11 दादल्यांचेर (0.21 टक्के) कुटुंब नियोजना खातीर शस्त्रक्रिया केल्ल्यो. भलायकी खात्यांतल्या वरिश्ठ अधिकाऱ्यांनी ही म्हायती दिली.
मेळिल्ले म्हायती प्रमाण, भलायकी खात्या वतीन दादल्यांचे नसबंदी खातीर व्हिसेक्टमी जाल्यार बायलां कातीर ट्युबेक्टमी नांवाची शस्रक्रिया करतात. अर्थीक वर्स 2022-23 त 1463 बायलांच्यो जाल्यार फक्त 3 दादल्यांचो नसबंदी शस्त्रक्रिया जाल्ल्यो. 2023-24 त बायलांच्या शस्त्रक्रियांची संख्या 528 जाल्यार दादल्यांच्या शस्त्रक्रियांची संख्या दोनान वाडली. त्या वर्सा बायलांच्यो 1991 जाल्यार दादल्यांच्यो 5 शस्त्रक्रिया जाल्ल्यो. 2024-25 त 1729 जाल्यार 3 दादल्यांच्यो नसबंदी शस्त्रक्रिया जाल्ल्यो.
हे विशीं अधिकाऱ्यान सांगलें, पुराय देशांत बायलांचे तुळेंत दादल्यांच्यो शस्त्रक्रिया उण्यो जातात. हाका विवीध कारणां आसात. कुटुंब नियोजना खातीर शस्त्रक्रिया बायलेन करपाची काय दादल्यान हो त्या कुटुंबाचो निर्णय आसता. भलायकी खातें हे संबंदांत कोणाचेरूच सक्ती करिना. मुळांत भुरगें जल्माक हाडपाचे प्रक्रियेंत दादलो फक्त शुक्राणू दिता. बाकीचें गुरवारपण, बाळंतपण, भुरग्याक वाडोवप तेच वांगडा कुटुंबाक सांबाळप ही सगलीं कामां बायलांकूच करचीं पडटात. हाका लागून लेगीत खूबशे खेपे बायलोच आपली शस्त्रक्रिया करपाचें थारायता.
खात्या वतीन कुटुंबांक आनी चड करून बायलांक समुपदेशन दितात. तांकां सासणाची नसबंदी करपाची आसा काय तात्पुरत्या स्वरुपाची गर्भधारणा आडावपाची आसा, हाची म्हायती घेतात. ते प्रमाण फुडले उपचार करतात. खात्या वतीन तात्पुरत्या स्वरुपाची गर्भधारणा आडावपाची साधनां लेगीत दितात. गोंयचो विचार केल्यार हांगाची लोकसंख्या, प्रजनन दर उणो आसा. अश्या वेळार कुटुंब नियोजनाची सक्ती करिनासतना दोन भुरग्यांच्या जल्मांत योग्य अंतर दवरचे खातीर यत्न करतात, अशें अधिकाऱ्यान सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
