भांगरभूंय | प्रतिनिधी
-ब्रेस्ट कॅन्सर, तोंडाच्या कॅन्सराचें प्रमाण चड
पणजीः गोंयांत दरवर्सा कॅन्सर दुयेंसाचें 1500 नवे दुयेंती मेळटात. लाख लोकां फाटल्यान 100 जाणांक कॅन्सर दुयेंस जाता. हें प्रमाण राष्ट्रीय सरासरी परस चड आसा. योग्य आहार, सोऱ्याचे वेसन आनी धुम्रपाल बंद करप, कॅन्सराची लक्षणां वेळांत वळखप अशी जतनाय घेतल्यार कॅन्सर दुयेंस जावपाचें प्रमाण उणें करपाची शक्यताय आशिल्ल्याची म्हायती इंडियन मेडिकल असोसिएशन गोंय विभागाचे अध्यक्ष डॉ. संदेश चोडणकार हांणी दिली.
डॉ. चोडणकार हांणी सांगलें, गोंयांत दरवर्सा मेळपी 1500 कॅन्सर दुयेंती मदीं सुमार 20 ते 25 टक्के (300 ते 375) दुयेंती हे ब्रेस्ट कॅन्सराचे आसतात, जाल्या तितलेच तोंडाच्या (ओरल कॅव्हीटी) कॅन्सर दुयेंसाचें मेळटात. बायलांत मेळपी कॅन्सर दुयेंतीं मदीं 40 ते 45 टक्के हे ब्रेस्ट कॅन्सराचे दुयेंती आसात. गोंयांत ओरल कॅव्हीटी कॅन्सराचें दुयेंतींचें प्रमाण हे राष्ट्रीय सरासरी परस उणें आसा.
गोंयांतल्या विवीध एनजीअो तशेंच भलायकी खात्यान तंबाखू विरोधांत केल्ले जागृताय मोहीमेक लागून हे शक्य जालां.
भारतांत दरेक णव्या व्यक्तीक ताच्या/तिच्या जिणेंत कॅन्सर जावपाची शक्यताय आसता. इंडियन कौन्सील ऑफ मेडिकल रिसर्च आनी नॅशनल कॅन्सर रजिस्ट्री प्रमाण देशांत 2022 त कॅन्सराचे सुमार 14 लाख दुयेंती मेळिल्ले. 2020 चे तुळेंत 2025 मेरेन कॅन्सरांच्या दुयेंतींचे संख्येंत 12.8 टक्क्यांनी वाड जावपाची शक्यताय आसा. बायलांत ब्रेस्ट कॅन्सर जाल्यार दादल्यां मदीं फोफीसाचो कॅन्सर जावपाचें प्रमाण चड आसा. कॅन्सर हे जगभरांतले मरणाचें दुसरे मुखेल कारण आसा. दरवर्सा जगभरांत कॅन्सराक लागून सुमार 10 दशलक्ष लोकांक मरण येता.
कॅन्सर हो जिणशैलीचें दुयेंस म्हूण वळखतात. धुम्रपान हे 13 वेगवेगळ्या प्रकाराच्या कॅन्साचे मुखेल कारण आसा. अल्कोहोल हे 7 पद्दतीच्या जाल्यार जाडेपण हे 12 पद्दतीच्या कॅन्सराचें मुखेल कारण आसा. सुमार 40 ते 50 टक्के कॅन्सर दुयेंस टाळप शक्य आसा, अशें डॉ. चोडणकार हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
