भांगरभूंय | प्रतिनिधी
पणजीः मुरगांव बंदर प्राधिकरणांत (एमपीए) फाटल्या तीन वर्सांत 22 मिलीयन मेट्रीक टन इतल्या कोळशाची हातळणी जाल्या. फाटल्या दोन वर्सांत कोळशाचे हातळेणेचें प्रमाण एक मिलीयन मेट्रीक टन इतलें देंवला अशी म्हायती पर्यावरण आनी हवामन बदल मंत्री आलेक्स सिक्वेरा हांणी दिली.
विधानसभेच्या पटलार मडगांवचे आमदार दिगंबर कामत हांणी विचारिल्ल्या प्रस्नांक लेखी जाप दितना पर्यावरण मंत्री आलेक्स सिक्वेरा हांणी ही म्हायती दिली.
वर्स 2023-24 ते 2025-26 मजगतीं एमपीएत 22 मिलीयन मेट्रीक टन इतली कोळशाची हाताळणी जाल्या. हातूंत कोकींग कोळसो, धातू नितळ करपी कोळसो, कच्चो पेट्रोलियम कोळसो, स्टीम कोळसो, सेमी सोफ्ट कोकींग कोळसो आनी थर्मल कोळशो ह्या कोळशांचो आस्पाव आसा.
वर्स 2023-24त 10.242 मिलीयन मेट्रीक टन इतलो कोळसो हातळ्ळा. तातूंत जेएसडब्ल्यू बर्थाचेर 5.346 मिलीयन मेट्रीक टन, अदानी मुरगांव पोर्ट टर्मिनल बर्थाचेर 4.574 मिलीयन मेट्रीक टन आनी मुरींग डोल्फीन बर्थाचेर 2.32 लाख मेट्रीक टन इतल्या कोळशाची हातळणी केल्या.
वर्स 2024-25त 9.308 मिलीयन मेट्रीक टन कोळशाची हातळणी जाल्या. हातूंत जेएसडब्ल्यू बर्थाचेर 4.374 मिलीयन मेट्रीक टन, अदानी मुरगांव पोर्ट टर्मिनल बर्थाचेर 4.630 मिलीयन मेट्रीक टन आनी मुरींग डोल्फीन बर्थाचेर 3.04 लाख मेट्रीक टन इतल्या कोळशाची हातळणी जाल्या.
अंदूं वर्सा 2025-26त जून मेरेन 2.56 मिलीयन मेट्रीक टन कोळसो हातळ्ळा. हातूंत जेएसडब्ल्यू बर्थाचेर 1.226 मिलीयन मेट्रीक टन, अदानी मुरगांव पोर्ट टर्मीनल बर्थाचेर 1.302 मिलीयन मेट्रीक टन आनी मुरींग डोल्फीन बर्थाचेर 38,570 मेट्रीक टन इतल्या कोळशाची हातळणी जाल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
