गोंयांत डेंग्यू नियंत्रणांत

भांगरभूंय | प्रतिनिधी

ऑक्टोबरांत फक्त 11 दुयेंती

भांगरभूंय । प्रतिनिधी

पणजी : ऑक्टोबरांत गोंयांत डेंग्यूचे फक्त 11 दुयेंती सांपडिल्ले. जानेवारी ते ऑक्टोबर 2024 चे तुळेंत 2025 च्या पयल्या 10 म्हयन्यांत डेंग्यूच्या दुयेंसींचो आंकडो सुमार स पटींनी उणो जाला. जानेवारी ते ऑक्टोबर 2024 त गोंयांत डेंग्यूचे 511 दुयेंती सांपडिल्ले. जाल्यार 2025 त ह्याच 10 म्हयन्यांच्या काळांत डेंग्यूचे 84 दुयेंती सांपडले. भलायकी खात्यान घराघरांनी वचून केल्ल्यो तपासण्यो, जागृती मोहिमो हाका लागून पोरूंचे तुळेंत अंदूं उणे दुयेंती सांपडल्यात अशी म्हायती वेक्टर बोर्न दुयेंस नियंत्रण कार्यावळीची उपसंचालक डॉ. कल्पना महात्मे हांणी दिली.

गोंयांत जानेवारी 2025 त 7, फेब्रुवारींत 9, मार्चांत 7, एप्रीलांत 6 मे म्हयन्यांत 4, जूनांत 10, जुलयांत 13, ऑगस्टांत 13, सप्टेंबरांत 4 जाल्यार ऑक्टोबरांत 11 दुयेंती सांपडले. ऑक्टोबरांत शिवोले 4, कुडटरे 2 जाल्यार पेडणें, कांदोळी, कोलवाळे, पर्वरे आनी बाळ्ळी वाठारांत दरेकी 1 दुयेंती सांपडिल्लो. अंदूं भलायकी खात्यान जळारांची पैदास जावपी सुवातो नश्ट करचे खातीर 2753 मोहिमो हातांत घेतिल्ल्यो. पोरूं 774 मोहिमो हातांत घेतिल्ल्यो. जाल्यार 5669 घरांनी जागृती मोहीम चालीक लायली. पोरूं ह्याच काळांत 3923 घरांनी जागृती मोहीम हातांत घेतिल्ली.

पावस सोंपले उपरांत गोंयांत बांदकामांक गती येता. ते खातीर स्थलांतरीत कामगागरांक हाडटात. हे कामगार रावतात थंय उदक अयोग्य तरेन सांठोवन दवरतात. ताका लागून लेगीत जळारांची पैदास जावन अश्या वाठारांनी डेंग्यूचे दुयेंती सांपडटात. हे कामगार दुसऱ्या राज्यांतल्या डेंग्यू हॉटस्पॉट वाठारांतल्यान आयिल्ले आसल्यार गोंयांत लेगीत डेंग्यूची लागण जावपाची शक्यताय आसता. आपले भोंवतणचो वाठार नितळ दवरप, खंयच उदक सांचून उरचें ना हाची जतनाय घेतली जाल्यार डेंग्यूच्या जळारांची पैदास उणी जावन दुयेंतींचो आंकडो उणो जावपाक शकता, अशें डॉ. महात्मे हांणी सांगलें.

‘डेंग्यू जाला बाराय म्हयन्यांतलो’

हे आदीं गोंयांत डेंग्यूचे दुयेंती गिमांत वा ऑगस्टांत चड सांपडटाले. मात आतां बाराय म्हयने डेंग्यूचे दुयेंती सांपडटात. फाटल्या दोन वर्सांत डेंग्यूक लागून 6 जाणांक मरण आयिल्लें. मात अंदूं जानेवारी ते ऑक्टोबर ह्या काळांत एकाय मरणाची नोंद जावंक ना, अशें डॉ. महात्मे हांणी सांगलें.