भांगरभूंय | प्रतिनिधी
पणजीः गोंयोंत जानेवारी ते नोव्हेंबर 2024 ह्या काळांत डेंग्यू दुयेंतीचो आंकडो पांच पटींनी चड उणो जाला. जानेवारी ते नोव्हेंबर 2024 मेरेन राज्यांत 562 डेंग्यू दुयेंती मेळ्ळे. जाल्यार 2025 वर्सा त्याच इकरा म्हयन्यांत 98 डेंग्यू दुयेंती सांपडले. भलायकी खात्यान घरांघरांनी तपासणी आनी डेंग्यू हॉटस्पॉटांचेर खाशेली तपासणी मोहीम अशा उपायांक लागून अंदूं उणे दुयेंती मेळ्ळे अशी म्हायती राष्ट्रीय व्हॅक्टर बोर्न रोग नियंत्रण कार्यावळीचे उपसंचालिका डॉ.कल्पना महात्मे हांणी दिली.
राज्यांत जानेवारी 2025 वर्सा 7, फेब्रुवारींत 9, मार्चांत 7, एप्रीलांत 6, मे म्हयन्यांत 4, जूनांत 10, जुलयांत 13, ऑगस्टांत 13, सप्टेंबरांत 4, ऑक्टोबरांत 11 आनी नोव्हेंबरांत 14 दुयेंती मेळ्ळे. नोव्हेंबरांत कोलवाळेंत 4, शिवोली 3 आनी पणजी, हळदोणें, म्हापशें, दिवचल, कासारवर्णे, पर्वरी आनी साळगांवां दरेकीं एक दुयेंती सांपडलो. भलायकी खात्यान जागृताय मोहीम वाडयल्या आनी फाटल्या वर्साच्या तुळेंत जळार प्रजनन सुवाती नश्ट केल्या. थळाव्या प्रशासनाच्या आदारान वेळोवेळ कोयर एकठांय करपाचें काम सुरू आसा.
पावसाळ्या उपरांत राज्यांत बांदकाम कामांचो आंकडो वाडटा. बांदकाम सुवातींनी स्थलांतरीत कामगारांची संख्या चड आसा. उदकाचो उक्तो सांठो आशिल्ल्यान अशा सुवातेर जळारांचें प्रजनन जाता आनी डेंग्यूचे दुयेंती हांगा मेळटात. हेर राज्यांतल्या डेंग्यू हॉटस्पॉट वाठारांतल्यान येवपी लोकाक लागून गोंयांतय डेंगू पातळपाची शक्यताय आसा. नागरिकांनी भोंवतणची नितळसाण दवरपाची जतनाय घेतली आनी उदक साचूंक दिवंक ना जाल्यार डेंग्यू दुयेंतीचो आंकडो आनीक उणो जावंक शकता अशें डॉ. कल्पना महात्मे हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
