भांगरभूंय | प्रतिनिधी
मुख्यमंत्री : टॅक्सी संघटने वांगडा घेतली बसका
भांगरभूंय । प्रतिनिधी
पणजी : टॅक्सी वेवसायांत सुरक्षा, पारदर्शकता आनी दराचें सुसुत्रीकरण करपा खातीर 10 स्प्टेंबराक टॅक्सी खातीर गोंय राज्य धोरण हाडटलें. हें धोरण गोंय कॅब एग्रिगेटर्स अधिसुचोवणेची सुवात घेवन हे अधिसुचोवणीचो मसुदो रद्द जातलो, अशें मुख्यमंत्री डॉ. प्रमोद सावंत हांणी टॅक्सीकारांची बसका घेतले उपरांत सांगलें.
कॅब एग्रिगेटर्स अधिसुचोवणेच्या कोफुसांवाचे फाटभुंयेर मुख्यमंत्री डॉ. प्रमोद सावंत हांणी टॅक्सी संघटनेच्या पदाधिकाऱ्या वांगडा खाशेली बसका आपयल्ली. टॅक्सी अॅप एग्रिगेटर्स विशीं जे टॅक्सीकारांचे विशय आसात ते जाग्यार घालपा खातीर टॅक्सीकारां कडेन चर्चा करून तांचो सुचोवण्यो घेतल्यो. हे बसकेंत येरादारी मंत्री मॉवीन गुदिन्हो आनी पर्यटन मंत्री रोहन खंवटे हांचे सयत टॅक्सी वेवसाय संबंदीत वाठारांतले आमदार हाजीर आशिल्ले.
ह्या वेळार दक्षीण आनी उत्तर गोंया सावन शेंकड्यांनी टॅक्सीकार आपल्या शिश्टमंडळाक तेंको दिवपा खातीर मंत्रालया भायर हाजीर आशिल्ले. तशेंच हे बसकेंत रेंट अ कॅब, मोटर सायकल पायलट आनी रिक्षा धनी संघटनेचे प्रतिनिधी हजर आशिल्ले.
दर थारावपा वांगडाच गोंयांत येवपी पर्यटकांक सुरक्षीत अणभव दिवपा खातीर आमकां एक एकंदरीत टॅक्सी धोरण हाडून हे विशय सुटावे करचे पडटले, अशें मुख्यमंत्र्यान सांगलें.
सगल्या टॅक्सी धनयांच्या प्रतिनिधींनी आपल्यो सुचोवण्यो दिल्यात आनी 10 सप्टेंबर मेरेन तांकां गोंय राज्य टॅक्सी धोरण मसुदो दिता अशें सांगलां. ह्या मसुदो धोरणांत सगल्या विशयांचो आस्पाव जातलो. सगळे परंपरीक टॅक्सी धनी फोंडें, सांखळी सयत दर्यादेगेर आनी रेल्वे स्टेशनाचेर चलोवपी टॅक्सी तशेंच गोंयांत येवपी पर्यटका खातीर हें धोरण आसतलें, अशी म्हायती मुख्यमंत्र्यान दिली.
वेवसायांत कशी पादर्शकता हाडप तशेंच पर्यटकांक सुरक्षीत अणभव कसो मेळटलो हो सगळो विशय लक्षांत घेवन परंपरीक टॅक्सी वेवसाय चालू उरचो हे खातीर सरकार धोरण हाडटा. कॅब एग्रिगेटर्स हें धोरण न्हय जाल्यार अधिसुचोवणीचो मसुदो आसा. एकदां राज्य धोरण आयले उपरांत हें धोरण कॅब अधिसुचोवणीची सुवात घेतलें आनी ही अधिसुचोवणी मागीर रद्द जातली, अशें मुख्यमंत्र्यान म्हणलें.
गोंयांत 10 स्प्टेंबर मेरेन टॅक्सी खातीर गोंय राज्य धोरण हाडपाच्या निर्णयाक टॅक्सी संघटणांनी येवकार दिला. टॅक्सीकारांक वांगडार घेवन टॅक्सीकार आनी येरादारी खात्याच्या अधिकाऱ्यांचो एक पंगड ह्या धोरणाचो मसुदो तयार करपा खातीर स्थापन करतले. तशेंच ओला, उबर आनी रॅपिडो ह्या सारकिल्ल्या अॅपांक गोंयांत केन्नाच परवानगी दिवचे ना आनी धोरण आयलें उपरांत टॅक्सी एग्रिगेटर्स अधिसुचोवणी रद्द करपाचें आस्वासन मुख्यमंत्र्या कडल्यान मेळ्ळां, अशें टॅक्सी संघटणेचे प्रतिनिधींनी बसके उपरांत सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
