गोंयांत जोडपी बायलांचे टक्केवारीत वाड

भांगरभूंय | प्रतिनिधी

विवीध मळार नोकरी, रोजगार करपी बायलांच्या प्रमाणांत 1.3 टक्क्यांनी वाड

पणजी: गोंयांत फाटल्या वर्साचे तुळेन जोडपी बायलांची संख्या वाडल्या. एका वर्सांत विवीध मळार नोकरी, रोजगार करपी बायलांच्या प्रमाणांत 1.3 टक्क्यांनी वाड जाल्या. 2024 वर्सा गोंयचे कार्यशक्तीत बायलांचें प्रमाण 21.2 टक्के आशिल्लें. 2025त तें वाडून 22.5 टक्के जालां. केंद्रीय सांख्यिकी आनी अंमलबजावणी खात्याच्या कार्यशक्ती सर्वेक्षण अहवालांतल्यान ही म्हायती मुखार आयल्या. हे खातीर खात्यान देशभरांतले 1.48 लाख कुटुंबांतले 3.5 लाख परस चड बायलांचें सर्वेक्षण केल्लें.

खात्यान देशांतल्या 15 वर्सां पिराये वेयले दादले आनी बायलांचे सर्वेक्षण केल्लें. अहवाला प्रमाण गोंयांतल्या बायल कर्मचाऱ्यांचें प्रमाण राष्ट्रीय सरासरी परस उणें आसा. देशांत बायल कार्यशक्तीचें सराशरी प्रमाण 26.3 टक्के आसा. हाचे आदीं गोंयांत 2022 वर्सा हें प्रमाण 17टक्के, 2023 वर्सा 21.9 टक्के आशिल्लें. गोंयचे कार्यशक्तीत बायल कर्मचाऱ्यांचें प्रमाण उणें आशिल्ल्या क्रमवारीत गोंय पांचव्या क्रमांकाचेर आसा. बिहारांत हें प्रमाण सगल्यांत उणें म्हणल्यार 15.5 टक्के आसा.

पुराय देशांत सिक्कीमांत वट्ट कार्यशक्तींत बायलांचें प्रमाण सगल्यांत चड म्हणल्यार 50.6 टक्के आसा. ताचे फाटोफाट नागालॅण्ड (49.5 टक्के), हिमाचल प्रदेश (48.8 टक्के), अरुणाचल प्रदेश (44.5 टक्के) मेघालय (46 टक्के) हांचो क्रमांक लागता. जाल्यार हरियाणा (15.9 टक्के), उत्तर प्रदेश (16.5 टक्के) आनी पंजाब (22.3 टक्के) हांचो क्रमांक लागता. केंद्र शासीत प्रदेशांत अंदमान, जम्मू आनी काश्मीरांत बायल कार्यशक्तीचें प्रमाण चड आसा. जाल्यार दिल्ली लक्षद्वीप हांगा हें प्रमाण उणें आसा.

गोंयांत गांवगिऱ्या वाठारांत बायल कार्यशक्तीचें प्रमाण 22.4 टक्के जाल्यार शारी वाठारांत 22.5 टक्के इतलें आसा. गोंयांत दादल्याचे तुळेन बायलांक मेळपी पगार उणो आसा. दादल्याक म्हयन्याक सरासरी 30,678 रुपया जाल्यार बायलांक 24,440 हजार रुपया पगार मेळत आशिल्ल्याचें अहवालांत नमूद केलां.