भांगरभूंय | प्रतिनिधी
पुणेंः गोंयांत जुगारांत पयशे हारिल्ल्यान निर्शेवणी येवन पुण्यांतल्या विकास शिवाजी टिंगरे (50, धानोरी) हाणें आत्महत्या केल्ल्याचें काल शुक्रारा 15 दिसां उपरांत उक्ताडार आयलां. दोन तरणाटे चलयांनी फटवणूक करून जुगारांत हारयिल्ल्यान आपणें आत्महत्या केल्या अशें ताणें चिटयेंत बरोवन दवरलां. ह्या प्रकरणांत विमानतळ पुलिसांनी गोंयच्या दोगी तरणाटे आड गुन्यांव दाखल केला. तांचीं नांवां अर्पिता दास (35) आनी सुश्मिता दास (33) अशीं आसात, अशें तांणी सांगलें. विकास हांच्या पुतान दुर्गेशान ही पुलीस कागाळ केल्या. 23 मे दिसा विकासान धानोरी जकात नाका हांगा आपले पतसंस्थेंत गोळ लावन घेतिल्लो.
विकास हे काँग्रेसीचे विश्रांतवाडी गटाचे अध्यक्ष आशिल्ले. तांचे आत्महत्ये उपरांत पुणें शारांत खवदळ जाल्लो. तांचे आत्महत्येचें कारण मात समजूंक नाशिल्लें.
पुलिसांनी दिल्ले म्हायती प्रमाण, “वेवसायीक आशिल्ले विकास आॅनलायन जुगार खेळटाले. दोनूय चलयांनी तांकां गोंयां जुगार खेळपाक यो अशें सांगलें. भितरली एकली तांचे वळखीची आशिल्ली. विकास थंय गेले. जुगारांत पयशे जिखतकच तांणी खेळ बंद करपाचो निर्णय घेतलो. पूण दोनूय चलयांनी तांकां खेळ बंद करपाक दिवंक ना. तांकां परत खेळपाक लायलें. तेन्ना ते हारले. मागीर पुण्यां येवन तांणी आत्महत्या केली.”
चिटयेंत दोनूय तरणाटेंचीं नांवां आसात. ‘तांणी म्हाका फटोवन हारयलो’ अशेंय बरयलां. पुलीस उपनिरीक्षक साळवी तपास करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
