भांगरभूंय | प्रतिनिधी
अनिल खंवटे, महेश मांजरेकर हांकां भेटयतले पुरस्कार
पुणे : पणजे ९ ते ११ जानेवारी मजगतीं संवसारीक मराठी अकादमी आयोजीत ‘शोध मराठी मनाचा’ हे संवसारीक संमेलन मनयतले. ९ जानेवारीक महाराष्ट्राचे मुख्यमंत्री देवेंद्र फडणवीस हांचे हस्तुकीं ह्या संमेलनाचें उक्तावण जातलें. मुख्यमंत्री डाॅ. प्रमोद सावंत हे ह्या संमेलनाचे येवकार अध्यक्ष, जाल्यार पद्मविभूषण डॉ. अनिल काकोडकार हे अध्यक्ष स्थानार आसतले.
गोंयच्या उद्देगीक मळावेले दिग्गज अनिल खंवटे हांकां ‘जागतिक मराठी भूषण पुरस्कार’, जाल्यार दिग्दर्शक, अभिनेते आनी निर्माते महेश मांजरेकर हांकां ‘मराठी जीवनगौरव पुरस्कार’ भेटयतले. महाराष्ट्राचे मुख्यमंत्री देवेंद्र फडणवीस आनी गोंयचे मुख्यमंत्री डाॅ. सावंत हांचे हस्तुकीं हे पुरस्कार भेटयतले. संमेलनाचे कार्याध्यक्ष दशरथ परब आनी सहकारी अनिल सामंत, रमेश वंसकार संमेलनाच्या आयोजनाची तयारी करतात, अशें संवसारीक मराठी अकादमीचे अध्यक्ष रामदास फुटाणे हांणी पुण्यांत जाल्ले पत्रकार परिशदेंत सांगलें. ह्या वेळार अकादमी वांगडी संजय ढेरे, कार्यकारिणी वांगडी महेश म्हात्रे (मुंबय) आनी संमेलन कार्यवाह गौरव फुटाणे हाजीर आशिल्ले.
अकादमी वतीन दितले ते मानाचे सन्मान उद्देग, संस्कृती आनी कला मळार दिल्ल्या योगदानाचें प्रतीक आसतले. अनिल खंवटे हांची उद्यमशीलता आनी समाजीक वचनबद्धताय, तशेंच महेश मांजरेकर हांच्या कलात्मक संवेदना आनी प्रयोगशील दिग्दर्शनान मराठी विश्व समृद्ध जालां. अणुशास्त्रज्ञ डॉ. अनिल काकोडकार हांचे अध्यक्षते खाला भरपी ‘शोध मराठी मनाचा’ ह्या संमेलनांत संवसारभरच्या कर्तबगार मराठी भावांच्या हाजेरींत ह्या दोनूय मान्यवरांचो भोवमान करपाचो सन्मान अकादमीक लाभता, हे विशीं रामदास फुटाणे हांणी खोस उक्तायली
ह्या तीन दिसांच्या संमेलनांत कर्तुबी मराठी व्यक्तिमत्त्वांचो सन्मान करतले. तांच्यो मुलाखती घेवन, ताचे जिणेंतलो प्रवास समजून घेतले. तशेंच गोंयच्या थळाव्या कलाकारांच्यो सांस्कृतीक कार्यावळीय जातल्यो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
