गोंयांत चार म्हालांची एचआयव्ही स्थिती हुस्क्याची

भांगरभूंय | प्रतिनिधी

डॉ. हुम्रस्कारः एड्सबाधितांक नांवां दवरचीं न्हय

भांगरभूंय । प्रतिनिधी

पणजीः बार्देस, तिसवाडी, मुरगांव आनी साश्ट म्हालांत एचआयव्ही एड्साची स्थिती हुस्को करपा सारकी आसा. हेर म्हालांचे तुळेंत ह्या म्हालांनी पॉजिटिव्हीटी दर सगळ्यांत चड आसा. एड्स दुयेंसा आड घाळपणाक लागून ही हुस्क्याची स्थिती जाल्या. ह्या म्हालांनी एड्स विशीं जनजागृती नेटान चालू आसा, अशी म्हायती गोंय राज्य एड्स नियंत्रण सोसायटीची संचालक डॉ. ललिता हुम्रस्कार हांणी दिली.

डॉ. हुम्रस्कार हांणी दिल्ले म्हायती प्रमाण, बार्देस, तिसवाडी, मुरगांव आनी साश्ट म्हालांत एड्स पॉजिटीव्हीटी दर फाटल्या दोन वर्सां परस उणो जाला आनी दुयेंती भितर उणाव दिसून आयलां. पूण हेर म्हालांची तुळा केल्यार ह्या चार म्हालांनी दर 10 पटीन चड आसा.

पोरूं जानेवारी ते डिसेंबर 2024 त तिसवाडी म्हालांत पॉजिटीव्हीटी दर 11.9 टक्के, बार्देस म्हालांत 18.7 टक्के, साश्ट म्हालांत 12.3 टक्के आनी मुरगांव म्हालांत 14 टक्के आसा. जाल्यार हेर म्हालांनी दर सरासरी 0.04 ते 5.5 टक्के आसा.

2023 त जानेवारी ते डिसेंबर मजगती तिसवाडी म्हालांत पॉजिटीव्हीटी दर 14.6 टक्के, बार्देस म्हालांत 20 टक्के, साश्ट म्हालांत 15 टक्के आनी मुरगांव म्हालांत 11.9 टक्के दर आशिल्लो. फक्त मुरगांव म्हालांतूच पॉजिटीव्हीटी दरांत वाड जाल्या.

एड्स प्रकरणां संबंदांत 2023 त तिसवाडी म्हालांत 38 केसी नोंद जाल्ल्यो आनी 2024 त 28 केसी नोंद जाल्यो. 2023 त बार्देस म्हालांत 52 केसी नोंद जाल्ल्यो आनी 2024 त 44 केसी नोंद जाल्यो. 2023 त साश्ट म्हालांत 39 केसी नोंद जाल्ल्यो आनी 2024 त 29 केसी नोंद जाल्यो. 2023 त मुरगांव म्हालांत 31 केसी नोंद जाल्ल्यो आनी 2024 त 33 केसी नोंद जाल्यो.
हे चारूय म्हाल हाय रिस्क बिह्येवियर श्रेणींत येतात. हाचो अर्थ लागण जावपी लोक उक्त्या विचाराचे आसात आनी दुयेंसा संबंदांत ते गंभीर नात. आयच्या काळांत डेटींग एप्स आनी हेर गजाली वरवीं लैगीक संबंद वाडल्यात, पूण ते खातीरुच ते कसलीच जतनाय घेनात. अनपेक्षीत शारिरीक संबंदांक लागून ही समस्या तयार जाल्या, अशी म्हायती डॉ. हुम्रस्कार हांणी दिली. हे खातीर आमी नेटान जागृताय उपक्रम चालीक लावपाक सुरवात केल्या. 366 गांवांतल्या शाळां आनी पंचायतींनी जागृताय चालू जाल्या. गोंयांत 9 एनजीओ 16 उपक्रमा वरवीं काम करतात आनी एचआयव्ही खातीर व्हडा प्रमाणांत टेस्टींग चालीक लायलां. कोण एचआयव्ही बाधीत आसात तांकां लोकांनी नांवां दवरचीं न्हय. जे मेरेन तांकां नांवां दवरपाचें बंद जावचे ना, ते चांचणी करपाक फुडें येवचे नात, अशें डॉ. हुम्रस्कार हांणी सांगलें.