भांगरभूंय | प्रतिनिधी
दृश्टी मरिनाचो उपक्रम
नुस्तेमारांचो आक्षेप
म्हापशें: गोंय सरकारान नेमणूक केल्ल्या दृश्टी मरीन ह्या दर्यादेग सुरक्षा संस्थेन गोंयांतल्या चार लोकप्रीय दर्यादेगांचेर टेळणी दवरपा खातीर सिहॉर्स नांवाची उफेवपी जेटी स्थानक हें एक नवें उपकरण तैनात केलां. ह्या उपक्रमाक लागून नुस्तेमार वेवसायीक तिडकल्यात. हें बांदकाम परवानगी नासतना करीत आशिल्ल्याचो आरोप कांदोळी नुस्तेमार संघटणेन केला.
कांदोळी नुस्तेमार संघटणेचे अध्यक्ष व्हिन्सेंट फर्नांडीस हांणी म्हणलें, मंगळारा आनी बुधवारा दर्यांतल्या भर उदकांत जेटी उबारीत आशिल्ल्याचें पळोवन आमकां अजाप दिसलें. जेन्ना आमी बंदर कप्तान अधिकाऱ्यां कडेन चवकशी केली तेन्ना तांणी अशा जेटी सारक्या खंयचेच संरचणुके खातीर परवानगी वा हरकत ना दाखलो दिवंक नाशिल्ल्याचें सांगलें.
तशेंच जेन्ना आमी घडणूक थळार आशिल्ल्या दृश्टीच्या कर्मचाऱ्यां कडेन विचारपूस केली, तेन्ना तांणी ही बोट जिवरक्षक कार्या खातीर आसा आनी थंय जेट स्की दवरतात. सगल्या वॉटर स्पोर्टस चालक तांच्यो जेट स्की दर्यादेगेर दवरतात. कोणूय अशे तरेन जेटस्की भर दर्यांत दवरिनात. नुस्तेमार क्षेत्रांत हें उबारतात आनी आमकां हे विशीं केन्नाच म्हायती दिली ना. ताका लागून हातूंत हस्तक्षेप करपाची मागणी फर्नांडीस हांणी सरकारी अधिकाऱ्यां कडेन केली.
मजगतीं, दृश्टी मरिनाच्या म्हणयाऱ्यान सांगलें, सीहॉर्स नांवाची ही जेटी एक हंगामी स्वरुपाचे उफेवपी स्थानक आसा. जें कळंगूटे, कांदोळी, मिरामार आनी बायणा ह्या गोंयांतल्या चार लोकप्रीय दर्यादेगेर पाळो दवरपा खातीर आसा. सीहॉर्स हें अशे तरेचें पयलें उफेवपी व्यासपीठ आसा. जें दर्यांत पुरायपणान कार्यरत रावन जिवरक्षक चौकी म्हूण काम करपा खातीर डिझायन केलां असो दावो तांणी केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
