भांगरभूंय | प्रतिनिधी
पणजीः गोंयांत गावठी भाजी उत्पादनांत वर्सभरांत सुमार 170 टनांची वाड जाल्या. तातूंत शेतकारांक सुमार 1 कोटी रुपया परस चड येणावळ जाली. जाल्यार भाजी उत्पादन घेवपी शेतकारांची संख्या 970 वयल्यान 1,115 चेर पावल्या. राज्य फलोत्पादन म्हामंडळा कडल्यान मेळिल्ले आंकडेवारींतल्यान फुडल्यो गजाली मुखार आयल्यात.
2012-22 त गोंयांत गावठी भाजयांचें उत्पादन 920.71 टन इतलें जाल्लें. ते खरेदी करून फलोत्पादन म्हामंडळान शेतकारांक 3.23 कोटी रुपया फारीक केल्लें, जाल्यार अंदूं 970 शेतकारांनी भाजयेचें उत्पादन घेतिल्लें. 2022-23त भाजी उत्पादनांत 170 टनांची वाड जाल्या. ह्या वर्सा 1,091.07 टन उत्पादन गोंयांत घेतलें. ते खातीर फलोत्पादन म्हामंडळान शेतकारांक 4.33 कोटी रुपया फारीक केल्ले. तशेंच भाजी उत्पादन करपी शेतकारां मदीं वाड जावन हो आंकडो 1,115 इतलो जाला.
गांवठी भाजी उत्पादनांत जाता ती वाड गोंया खातीर थाकाय दिवपी आसा. मुख्यमंत्री डॉ. प्रमोद सावंत हांणी सुरू केल्ल्या आत्मनिर्भर भारत- स्वयंपूर्ण गोंय मोहिमेचो भाजी उत्पादन वाडी खातीर फायदो जाता अशी प्रतिक्रिया शेतकी खातें तशेंच फलोत्पादन म्हामंडळाच्या अधिकाऱ्यांनी उक्तायल्या. मजगतीं, कोरोना काळांत देशभरांतल्यो बाजारपेठो बंद जाल्ल्यान भाजी, अन्नधान्याचो प्रस्न गंभीर जाल्लो. लॉकडावन, जनता कर्फ्यू हाका लागून भाजयेच्या दरांत व्हड प्रमाणांत वाड जाल्ली. गोंयाक चडशी भाजी कर्नाटकांतल्यान मेळटा. ताका लागून गोंयांत भाजयेचे दर मळबाक तेंकिल्ले. हीच संद पळोवन गोंयच्या शेतकारांनीय त्या काळांत भाजी उत्पादन करून व्हड प्रमाणांत अर्थीक फायदो मेळयिल्लो. फलोत्पादन म्हामंडळूय थळाव्या शेतकारां कडल्यान वाडीव दरान भाजी विकत घेता, हाका लागून तीन- चार वर्सां सावन भाजी उत्पादन घेवपी शेतकारां मदीं दर वर्सा वाड जायत आसा.
2022-23 तले ‘टॉप 5′ शेतकार
नांव उत्पादन (टनांत) फायदो लाखांत
नागेश सामंत (धारबांदोडें) 123.61 41.42
इनासियो फर्नांडीस (मडगांव) 39.27 19.43
प्रसाद वेळीप (काणकोण) 28.25 14.39
रजत प्रभू (शिरोडें-फोंडें) 36.06 13.28
डोमिंगोज कॉस्ता (कासावली) 33.01 12.41
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
