भांगरभूंय | प्रतिनिधी
बोर्डें १२, कारापुरा १३ आनी साळांत १४ मार्चाक
साळ: गोंयच्या फामाद उत्सवां मदलो साळांतलो गडे उत्सव एक. ह्या उत्सवाक गोंयचे तशेंच हेर राज्यांतले हजारांनी भावीक येतात. अंदूं साळांतले गडे १४, १५ आनी १६ मार्च अशे तीन दीस मनयतले. उत्सवाक येवपी कांय भावीक मस्तेपणाय करतना दिसतात. हाका लागून गांवांत वादाचें वातावरण निर्माण जाता. तर अशे वाद अंदूं जावचे न्हय आनी हो उत्सव शांतीकायेन जावचो म्हणून भायल्यान येवपी भाविकां खातीर थळाव्यांनी कांय नेम केल्यात आनी ते सगल्यांनी खरपणान पाळचे, अशी शिटकावणीय दिल्या.
थळाव्यांच्या म्हणण्या प्रमाण, ह्या उत्सवाक गांवांत येवपी कोणेंच सोर्याच्यो बाटल्यो घेवन येवचें न्हय, तशेंच मोबायलाचेर फोटो, शुटींग करपाचोय यत्न करचो न्हय. ताका हांगा बंदी घाल्या. जर कोण अशें करतना सांपडलो जाल्यार ताचो मोबायल, कॅमेरा काडून घेतले. तशेंच जांकां कोणाक ह्या उत्सवाक येवपाचें आसा तांणी गांवचे शिमे भितर रातचें साडेणव मेरेन पावचें. सांगिल्ल्या वेळार पावना जाल्यार गांवां भितर येवपाक मेळचें ना. साळांतल्या दाड सांखळयाचे कुशीकचो रस्तो, जो धुमाशेंच्या मार्गान येता तो रातच्या सुमार ९ ते ९.३० वरां मजगतीं बंद करतले. जाल्यार कांसरपालच्यान येवपीय रस्तो सांगिल्ल्या वेळार बंद करतले अशें उत्सव समितीन कळयलां.
हाका लागून जांकां ह्या गड्यांक येवपाचें आसा, तांणी रातच्या ९ मेरेन साळ गांवांत पावपाची विनवणी थळाव्यांनी भाविकां कडेन केल्या. गडे सोंपचे पयलीं गांवचे भायर वच्चें न्हय. उत्सवाक सुरवात जाले उपरांत कोणेंच मोबायल, गाडयेच्यो वा हेर लायटीचो वापर करचो न्हय अशीय मागणी केल्या.
हे सगळे नेम करपाचें कारण म्हणल्यार फाटलीं दोन वर्सां गांवांत आयिल्ल्या भाविकां कडल्यान कांय अश्यो घडणुको घडल्यो जाचो वायट परिणाम गांवच्या लोकांक सोंसचो पडलो. फुडाराक अशें कांयच घडचें न्हय म्हणून हे नेम गांवच्या लोकांनी जारी केल्यात अशी म्हायती थळाव्यांनी दिल्या. हे नेम खरपणान सगल्यांनी पाळचे अशीय शिटकावणी दिल्या. सध्या पुराय साळ गांव गड्यांचे तयारेक लागला.
गोंयांत साळांतले गडे फामाद आसाच. हेर वाठारांनीय गडे उत्सव तितलेच उमेदीन, भक्तीभावान मनयतात. कुडण्यां, आमोण्यां, पिळगांवां, कारापूर, सांखळे, बोर्डें- दिवचल ह्या वाठारांनीय गडे जातात. दर वाठारांत हो उत्सव मनोवपाची पद्दत वेगळी आसता. हे गडे पळोवपाक लोक गर्दी करतात. कांय कडेन अदृश्य शक्ती पेटिल्ली चूड दाखयता. मागीर गडे थंय धांवून वतात. सगल्या लोकांक ही गूढ शक्त पळोवपाक मेळटा. ह्या गांवांतल्या लोकांनीय आपल्या गडे उत्सवांकूय कांय नेम घाल्यात आनी ते पाळपाची मागणी भाविकां कडेन केल्या.
अंदूं कुडणेंचे आनी आमोणेचे गडे ११, १२ आनी १३ मार्चाक जातले. पिळगांवच्या परंपरीक गड्यांक आयच्यान सुरवात जातली. जाल्यार कारापूर, सांखळे १३ आनी १४ मार्चाक हो गडे उत्सव मनयतले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
