भांगरभूंय | प्रतिनिधी
एमपीएः देशी क्रूझ आंकड्यांत वाड, आंतरराष्ट्रीय क्रूझ मात्शें फाटीं
भांगरभूंय । प्रतिनिधी
पणजीः गोंयच्या क्रूझ पर्यटन मळार बरी खबर आसा. कोविडा उपरांत हें मळ परतून जाग्यार पडपाक लागलां. देशी क्रूझ पर्यटनाचे बाबतींत 2023- 24 पर्यटन मोसमांत 2018 चो आंकडो हुंपला. जाल्यार आंतरराष्ट्रीय क्रूझ पर्यटनांत मात्शी वाड जाल्या, पूण कोविडा पयलीचो आंकडो अजून हुपूंक ना. अंदूं देशी आनी आंतरराष्ट्रीय दोनूय मेळून 53 क्रूझ बोटींतल्यान 78 हजार पर्यटक मुरगांव बंदराचेर देंवल्यात, अशी म्हायती मुरगांव बंदर प्राधिकरण (एमपीए) हांणी दिल्या.
एमपीएन सादर केल्ल्या अहवाला प्रमाण वर्स 2018 ते 2024 मेरेन 276 देशी क्रूझ बोटी बंदराचेर आयल्लो. तातूंतल्यान 2,45,623 पर्यटक गोंयांत आयिल्ले. जाल्यार 2014 ते 2024 मेरेन 229 आंतरराष्ट्रीय क्रूझ बोटी बंदराचेर आयिल्ल्यो आनी तातूंतल्यान 2,66,044 इतले विदेशी पर्यटक गोंयांत आयिल्ले.
2023- 24 पर्यटन मोसमांत 18 आंतरराष्ट्रीय क्रूझ बोटी बंदराचेर येवन 15,700 विदेशी पर्यटक गोंयांत आयिल्ले. आदल्या वर्साची तुळा केल्यार 2 बोटींनी आनी 8 हजार पर्यटकांनी वाड जाल्या. 2022- 23 पर्यटन मोसमांत 15 क्रूझ बोटींतल्यान 7086 पर्यटक गोंयांत आयिल्ले. पूण कोविडा पयलीचो आंकडो हुपप ही गजाल हुस्क्याची जाल्या. 2020- 21 आनी 2021- 22 मोसमांत कोविडाक लागून क्रूझ बोटींचो आंकडो शून्य आसलो. ते आदीं 2019- 20 च्या मोसमांत 38 क्रूझ बोटींतल्यान 53,870 विदेशी पर्यटक गोंयांत आयिल्ले.
2023- 24 मोसमांत 35 देशी क्रूझ बोटी मुरगांव बंदराचेर येवन तातूंतल्यान 62,804 पर्यटक गोंयांत आयिल्ले. पयलीच्या वर्साचे तुळेंत ह्या आंकड्यात 4 क्रूझ बोटींनी 7 हजार पर्यटकांनी वाड जाल्या. 2022- 23 च्या मोसमांत 31 क्रूझ बोटींतल्यान 55,485 पर्यटक गोंयांत आयिल्ले. 2021- 22 च्या मोसमांत 18 बोटींतल्यान 23,503 पर्यटक गोंयांत आयिल्ले. 2020-21 त कोविडाक लागून एकूय बोट येवंक ना. पूण कोविडा पयलीं 2019- 20 च्या मोसमांत 125 क्रूझ बोटींतल्यान 71,094 पर्यटक गोंयांत आयिल्ले. 2018-19 च्या पर्यटन मोसमांत 67 क्रूझ बोटींतल्यान 32,737 पर्यटक गोंयांत आयिल्ले. हो आंकडो 2023- 24 च्या पर्यटन मोसमांत हुपिल्ल्यान देशी क्रूझ पर्यटन मळार धादोसकाय पळोवपाक मेळटा.
ऑक्टोबर मेरेन नवो क्रूझ टर्मिनल पुराय
मुरगांव बंदरा वयल्या आंतरराष्ट्रीय क्रूझ टर्मिनलाचें काम ऑक्टोबर 2025 मेरेन पुराय जातलें. हातूंत देशी आनी विदेशी क्रूझ बोटीं खातीर वेगवेगळे टर्मिनल आसतले. हे इमारती भितर आंतरराष्ट्रीय पर्यटकां खातीर इमिग्रेशन केंद्र आनी विमानतळा सारकें शॉपींग मॉल आसतलें. नव्या टर्मिनलाक लागून 80 आंतरराष्ट्रीय क्रूझ आनी देशी 130 क्रूझ बोटी येतात, त्या पर्यटन मोसमांत गोंयांत येतल्यो, अशें एमपीएचे कार्यकारी अधिकारी महेश नायक हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
