गोंयांत क्रिस्तांव उणे जाले, मुस्लिम वाडले, कारण….
भांगरभूंय | प्रतिनिधी
कोचींतले कार्यावळींत राज्यपाल पिल्ले हांचें उलोवप
कोची, खबरां संस्था : कोचींतले एके चर्चींतले कार्यावळींत गोंयचे राज्यपाल श्रीधरन पिल्ले हांणी क्रिस्तांव आनी मुस्लिमां विशीं एक उलोवप केलें. गोंयांत क्रिस्तांवां परस मुस्लिमांची लोकसंख्या वाडल्या. गोंय मुक्ती वेळार ३६ टक्के क्रिस्तांव आशिल्ले. ते आतां २५ टक्क्यांचेर आयल्यात. मुस्लिम समाजाची लोकसंख्या पयलीं ३ टक्के आशिल्ली, ती आतां १२ टक्के जाल्या. कांय दिसाळ्यांनी हें विशींची खबर आयल्या, अशें तांणी सांगलें. तांच्या ह्या वक्तव्याचेर सोशल मिडियाचेर टिका जाल्या.
उपरांत पत्रकारां कडेन उलयतान तांणी आपूण जें उलयलों, ताचो प्रसार माध्यमांनी वेगळोच अर्थ काडलो, अशें सांगलें. हांव लोकसंख्या वा खंयच्याच विशिश्ट धर्म, समाजा विशीं उलोवंक ना, तर म्हाका फक्त ‘प्रतिभा’ दुसरे कडेन वता (ब्रेन ड्रेन) तो आंकडो दाखोवपाचो आशिल्लो. जेन्ना आर्चबिशप आनी कांय क्रिस्तांव फुडारी म्हाका मेळ्ळे, तेन्ना हांवे तांचे कडेन प्रतिभावान लोक उणे जायत चल्ल्यात, हें कित्याक लागून जाता, ताचो अभ्यास करपाचो सल्लोय हांवें तांकां दिलो, अशें राज्यपाल पिल्ले हांणी सांगलें. गोंयांतल्या क्रिस्तांव समाजांतल्या जायत्या लोकांनी नोकरी, वेवसाया खातीर हेर कडेन स्थलांतर केलां, अशेंय पिल्ले हांणी चर्चींतले कार्यावळींत सांगलें.
एखादे व्यक्ती कडेन प्रतिभा आसूनय तिका योग्य तीं साधनां वा संधी मेळना, तेन्ना तिका दुसरे कडेन वच्चें पडटा, ताका ब्रेन ड्रेन वा प्रतिभा दुसरे कडेन वचप म्हणटात. शेंकड्यांनी वर्सां सावन हें जायत आसा. हुशार लोक दुसरे कडेन स्थलांतर करीत आयल्यात. तें केलें तांणी उदरगत केली. उरफाटें जे गांवांतूच रावले, ते फाटीं पडले, ना जाले. प्रतिभा आनी संधीचो योग्य सांगोड घालीत जाल्यार उदरगत नेटान जाता, अशें अर्थशास्त्र सांगता. मुखार वतलो जाल्यार गांव सोडपाक जाय, अशें खूब जाण म्हणटात.
हजारांनी गोंयकारांनी नोकरी, वेवसाया खातीर पयलीं सावन स्थलांतर केलां. गोंय हें इतिहासीक बंदर. हांगाच्या अरबी देश, ग्रीस, आफ्रिकेंत वेपार चलतालो. पुर्तुगेज काळांत गोंयकारांनी युरोपी देश, लाहोर, कराची, कोलकाता, कालिकत, केन्या, दक्षीण आफ्रिका, आफ्रिकेंतले हेर देश हांगां स्थलांतर केलें. तातूंत चडशे क्रिस्तांव समाजांतले लोक आसले. आयज पसून नोकरेक लागून बरेच गोंयकार युके, आखाती देशांनी वतात. हातूंत क्रिस्तांवां वांगडा हिंदू, मुस्लिमूय आसात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
