भांगरभूंय | प्रतिनिधी
पणजीः गोंयांतल्या वेगवेगळ्या केंद्र सरकाराच्या कार्यालयांनी थळाव्या लोकांक रोजगाराची संद मेळना. हांगाच्या भरतींत स्थलांतरीत तरणाट्यांक नोकरी मेळपाक लागल्या. हाका लागून थळाव्या तरणाट्यां कडेन अन्याय जावपाक लागला. राज्यांतल्या केंद्रीय भरतींत फकत थळाव्या लोकांक संद दिवची अशी विनवणी करून केंद्रीय मंत्र्याक पत्र बरयलां अशें सांताक्रूझ गट काँग्रेसीचे अध्यक्ष जॉन नाझारेथ हांणी सांगलें. बिरेस्तारा पणजेंत जाल्ले पत्रकार परिशदेंत ते उलयताले. ह्या वेळार मॅरियन अारावजो आनी हेर वांगडी हाजीर आशिल्ले.
फाटल्या कांय वर्सां सावन टपाल खात्यांत, राष्ट्रीयकृत बँकांनी आनी राज्यांतल्या हेर केंद्रीय कार्यालयांनी हेर राज्यांतल्या लोकांची भरती सुरू आसा अशें जॉन नाझारेथ हांणी सांगलें. ह्या लोकांक कोंकणी समजना. हाका लागून जायत्यो समस्या निर्माण जावपाक लागल्यात. टपाल खात्यांत महाराष्ट्रांतल्या लोकांक भरती केल्यात. तांकां कोंकणी उच्चार समजना. तशेंच थळाव्या वाठाराची म्हायती नाशिल्ल्यान जायत्या जाणांक पत्रां वेळार मेळनात. हाका लागून लोकांक लुकसाण जावपाक लागलां.
तांणी म्हणलें, हे संबंदी आमी केंद्रीय येरादारी मंत्री ज्योतिरादित्य सिंधिया आनी अर्थमंत्री निर्मला सीतारमण हांकां पत्र बरयलां. ह्या दोनूय खात्यां खातीर गोंयांत भरती जावपाची आसत जाल्यार पंदरा वर्सांचें राबितो प्रमाणपत्र आशिल्ल्या आनी कोंकणी समजुपी लोकांकच संद दिवची अशी मागणी आमी केल्या. गोंयांत दोन खासदार आनी एक केंद्रीय मंत्री आसात. हे बाबतींत तांणी यत्न करपाची गरज आसा. टपाल खात्यांत महाराष्ट्रांतल्या लोकांची भरती थांबली ना जाल्यार आमी पोस्टमास्टर जनरलाक घेरांव घालतले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
