भांगरभूंय | प्रतिनिधी
राज्यसभा खासदार सदानंद तानावडे हांच्या प्रस्नाक जाप
पणजी: फाटल्या पांच वर्सांत केंद्रीय रस्तो आनी म्हामार्ग मंत्रालयान गोंयांत 3,619 कोटी रुपया खर्च करून 199.91 किमि लांबायेचे रस्ते बांदल्यात. ह्या निधींतल्यान गोंयांतले 65 रस्ते प्रकल्प ह्या पांच वर्सांत पुराय केल्ल्याची म्हायती केंद्रीय रस्ते आनी म्हामार्ग मंत्री नितीन गडकगी हांणी खासदार सदानंद शेट तानावडे हांणी राज्यसभेंत विचारिल्ल्या लेखी प्रस्नाचे जापेंतल्यान दिली.
गोंयच्या रस्ते प्रकल्पां खातीर केंद्रीय रस्ते आनी म्हामार्ग मंत्रालयान फाटल्या पांच वर्सांत 4,039 कोटींचो निधी मंजूर केल्लो. पूण कांय प्रकल्प जमीन संपादना सयत हेर कांय कारणांक लागून प्रलंबीत उरले. तातूंतले जे 65 प्रकल्प पुराय केल्यात. तांचेर पांच वर्सांत 3,619 कोटी रुपया खर्च केले अशें मंत्री गडकरी हांणी जापेंत म्हणलां.
मजगतीं, फाटल्या पांच वर्सांत केंद्रीय मंत्री नितीन गडकरी हांणी गोंयांत मुळाव्यो साधन सुविधा उबरपाक सदांच प्रोत्साहन दिलां. गोंयची वाडटी लोकसंख्या आनी येरादारीचो विचार करून तांणी पांच वर्सांत गोंयच्या रस्त्यांचे 3,619 कोटी रुपया खर्च केल्यात.
पांच वर्सांतले रस्ते आनी खर्च (कोटी)
वर्ष प्रकल्प लांबी वितरीत खर्च
2019-20 10 112.85 977 977
2020-21 8 39.70 734 734
2021-22 11 7.44 615 615
2022-23 14 1.85 673 673
2023-24 22 38.07 620 620
वट्ट 65 199.91 3,619 3,619
बँकां कडल्यान जावपी रिणांचे पुरवणे कडेन ओडलें लक्ष
राज्यसभा खासदार सदानंद शेट तानावडे हांणी बुधवारा राज्यसभेंत शुन्य वराक गोंयांतले ल्हान वेवसायीक तशेंच विद्यार्थ्यां मुखार बँकां कडल्यान उब्यो रावत आशिल्ल्या समस्यांचेर उजवाड घालो. गोंयांतल्या बँकां कडल्यान वेवसायीक जावपी रिणाची पुरवण उणी आसा. तशेंच विद्यार्थ्यांक शिक्षणीक रिणां दिवपा खातीर लेगीत बँको फाटीं आसात. गोंयांतल्या बँकांनी पतधोरण बदलून ल्हान वेवसायिकांच्यो आनी विद्यार्थ्यांच्यो समस्या सोडोवपाची मागणी तांणी केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
