भांगरभूंय | प्रतिनिधी
पणजी : 2026 च्या अखील भारतीय व्याघ्र गणने खाला गोंयांत मार्च सावन तीन म्हयन्यांची रानवटी जीव मेजणी मोहीम हातांत घेतले. ही मेजणी मार्चच्या पयले पंद्रशे उपरांत सुरू जावन मे निमाणे मेरेन चलतली.
गोंयांतल्या रान विभागांतल्या कर्मचाऱ्यांचें प्रशिक्षण पुराय जालां. हें प्रशिक्षण भारतीय रानवटी जीव संस्था आनी राष्ट्रीय वाग संवर्धन अधिकारिणीच्या तज्ञां वरवीं दिलां. वाग मेजणे खातीर अंदूं आधुनीक तंत्रज्ञानाचो व्यापक वापर करतले. तीन पांवड्यांचेर ही मेजणी जातली.
मार्चांत सुरू जावपी पयल्या पांवड्याचेर तयार केल्ले पंगड वागांचे अप्रत्यक्ष पुरावे नोंद करतले. तातूंत पावलांचे ठशे, नाखटांच्यो आनी ओरबड्यांच्यो खुणो, विश्ठेचे नमुने तशेंच भक्ष्याचें अवशेश हांचो आस्पाव आसतलो. ते भायर रानांतली वनस्पत घनता, उदकाच्यो सुवातो आनी मानवी हालचालींची नोंद करतले.
दुसऱ्या पांवड्याचेर उपगिऱ्याचे म्हायतीचो वापर करून रान वाठाराचो विस्तार, भूंय भागाची रचना, उदका स्रोत आनी संभाव्य मानवी अतिक्रमणाचो अभ्यास करतले.
तिसऱ्या पांवड्याचेर निश्चीत केल्ल्यो पांयपाटो, दोंगर रांको आनी उदकाच्या सुवातांचेर कॅमेरा ट्रॅप बसयतले. कृत्रीम बुद्दीमत्तेच्या आदारान दरेका वागाची वळख पटोवपाची प्रक्रिया हातांत घेतले.
ह्या सगल्या प्रक्रियांक लागून गोंयांतल्या वागांची नेमकी संख्या, तांचो रावपाचो वाठार आनी हालचालींचे नमुने समजुपाक मजत जातली. रानवटी जीव संवर्धनाचे नदरेन ही मेजणी म्हत्वाची थारतली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
