भांगरभूंय | प्रतिनिधी
-हेर राज्यांतल्या रेंवेचेर निंबून रावचें पडपाची शक्यतायपणजीः कायदेशीर रेंव काडपा खातीर सीआरझॅड परवाने मेळोवपा विशीं केंद्र सरकारा कडेन चर्चा करतले अशें मुख्यमंत्री डॉ. प्रमोद सावंत हांणी सांगिल्ले अासले तरी केंद्रा कडल्यान ते विशीं सकारात्मक मत दिवपाची शक्यताय नाशिल्ल्यान गोंयांत रेंव काडपाचो मार्ग आनीक कठीण जाला. देखून गोंयाक हेर राज्यांतल्यान येवपी रेंवेचेर निंबून रावचें पडपाची शक्यताय आसा.
2018 वर्सा रेंव काडपाक राष्ट्रीय हरीत लवादांत (एनजीटी) आव्हान दिल्लें, त्या वेळार हो मुद्दो फकत जिल्लो सर्वेक्षण अहवालाचो आशिल्लो. ते खातीर गोंयांत रेंव काडपाचें काम बंद केल्ले. ह्या वेळार कायदेशीर रेंव काडपाक सुरू करपाचे प्रक्रियेंत सीआरझॅड परवान्याचो प्रस्न उप्रासलो ना. देखून खण खात्यान जिल्लो सर्वेक्षण अहवाल तयार करून ही प्रक्रिया सुरू केल्ली. ते भायर खण खात्यान नागरिकां कडल्यानय अर्ज मागल्यात. पूण रेंव काडपा खातीर सीआरझॅड परवाने दिवचे नात अशें आतां पर्यावरण खात्यान स्पश्ट केल्ल्यान ही प्रक्रिया अाडखळून उरल्या.
कांय दिसां आदीं मुख्यमंत्री डॉ. प्रमोद सावंत हांणी केंद्र सरकारा कडेन रेंव काडपाच्या सीआरझॅड परवान्या विशीं चर्चा करतले अशी हमी दिल्ली. पूण केंद्र सरकार फकत गोंया खातीर वेगळो निर्णय घेवंक शकना. देखून गोंयांत कायदेशीर रितीन रेंव काडाक सुरू करप कठीण आसा अशें सूत्रांनीय सांगलां.
मजगतीं, फाटल्या कांय वर्सां सावन गोंयांत रेंव काडप बंद आसा. ताचो थळाव्या लोकांक खर धपको बसपाक लागला. सध्या राज्याक हेर राज्यांतल्यान रेंव हाडची पडटा. ताका लागून रेंवेंच्या दरांत व्हड प्रमाणांत वाड जाल्ल्यान थळाव्यां लोकां मदीं निरशेवणी आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
