भांगरभूंय | प्रतिनिधी
भांगरभूंय । प्रतिनिधी
वास्कोः कुठ्ठाळेच्या जिल्हो पंचायत मतदारसंघांत मत विभागणी करून भाजपाक जैत मेळोवन दिवपा खातीर रिव्होल्सुशनरी गोवन्सान दुबळो उमेदवार उबो केला, अशें काँग्रेस फुडारी ओलेंसिया सिमोईश हांणी सांगिल्लें. प्रत्यक्षात आरजीचो उमेदवार लेस्ली गामा हाका दुसऱ्या नंबरांची मतां मेळ्ळ्यांत. जिल्हो पंचायत वेंचणुकेंत गोंयात काँग्रेस पक्ष सोपपाचे वाटेर आसा अशें दाखोवन दिलां अशा उतरांनी लेस्ली हाणे सिमोईश हांका जाप दिल्या.
कोणालो उमेदवार दुबळो हें लोकांनी सिमोईश हाका दाखोवन दिलां. कुठ्ठाळे आमचो स्ट्राँगहोल्ड अशें सांगपी काँग्रेस पक्षाच्या उमेदवाराक म्हाका मेळ्ळ्यांत तितल्या मतांच्या लागीं येवपाक लेगीत जमलें ना. दुसऱ्या उमेदवाराक नांव दवोरपा पयलीं शंबर फावट विचार करात अशें हांक सिमोईश आनी काँग्रेस पक्षाक सांगपाक सोदतां अशें लेस्ली हाणे पत्रकारां कडेन उलयतना सांगलें.
पयलीच वेंचणूक विद्यमान आमदाराचे घरकान्नी आड लडोवन दुसऱ्या नंबराची मतां मेळोप तितली सोपी गजाल न्हय. मात लोकांचो मोग आनी कार्यकर्त्यांचे कश्ट हाका लागून हें हांव करपाक शकलो. आरजीची गोंयांत पाळांमुळां घट्ट जावपाक लागल्यांत. फुडले गोंय विधासभा वेंचणुकेंत आरजी हो गोंयकारां सामकार काँग्रेसा परस बरो पर्याय आसतलो अशें ताणे सांगलें.
मतदान सामकें उणे जालें आनी ताका लागून वेंचणुकेचो निकाल एकतर्फी लागलो. जैत आनी हार हें आरजी खातीर म्हत्वाचें न्हय. लोकां खातीर वावुरप हेच आमचे ध्येय आसा. काँग्रेस पक्ष आपले उमेदवार उबे करता ते जैत मेळोवपा खातीर न्हय जाल्यार मतविभागणी करपा खातीर हेंच दिसून आयलां. गोंयकारांचो काँग्रेसा वयलो विस्वास उडून गेला अशें गामा हांणे सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
