भांगरभूंय | प्रतिनिधी
पणजीः गोंयांत 2024 त एचआयव्ही एड्स पॉझिटिव्ह प्रमाण आनी हे दुयेसांक लागून येवपी मरणांत उणाव दिसून आयला. वर्स 2023 त एचआयव्ही पॉझिटिव्हचें प्रमाण 0.18 टक्के आसले. पूण 2024 त ह्या प्रमाणांत मात्सो उणाव जावन तो 0.17 टक्क्याचेर पावला. जाल्यार एड्साक लागून येवपी मरणांत अर्द परस चड उणाव जावन 2023 त 32 मरणा वेल्यान हो आंकडो 2024 त 15 मरणांचेर पावला, अशी म्हायती राज्य एड्स नियंत्रण सोसायटीन दिल्या.
राज्य एड्स नियंत्रण सोसायटीन दिल्ले आंकडेवारी प्रमाण 2023 त 1,50,573 जाणांची एचआयव्ही खातीर चाचणी जाल्ली. तातूंतले 270 जाण पॉझिटिव्ह जावन हे पॉझिटिव्हीचें प्रमाण 0.18 टक्के आशिल्ले. तातूंतले दादले 181, बायला 76, तृतीयपंथी 3 आनी आवय कडल्यान एचआयव्ही पिडेस्त जाल्ल्या 10 बाळकांचो आस्पाव आसलो.
जाल्यार 2024 त 1,40,488 जाणांची एचआयव्ही खातीर चांचणी जाल्ली. तातूंतले 240 जाण पॉझिटिव्ह आयले. तातूंत 159 दादले, 76 बायलां आनी आवय कडल्यान एचआयव्ही पिडेस्त जाल्ल्या 5 बाळकांचो आस्पाव आसा.
जाल्यार फाटल्या दोन वर्सांत 47 जाणांक एचआयव्हीक लागून मरण आयलां. पूण 2023 चे तुळेंत 2024 त मरणांचो आंकडो बरोच उणो जाला. 2023 त 270 एड्स पिडेस्ता मदल्या 32 जाणांक ह्या दुयेंसांक लागून मरण आयिल्लें. तातूंत 21 दादले आनी 11 बायलांचो आस्पाव आसा. जाल्यार 2024 त 240 एड्स पिडेस्ता मदल्या 15 जाणांक मरण आयिल्लें. तातूंत 9 दादले आनी 6 बायलांचो आस्पाव आसा, अशी म्हायती राज्य एड्स नियंत्रण सोसायटीन दिल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
