भांगरभूंय | प्रतिनिधी
पणजीः गोंयांत जानेवारी ते ऑक्टोबर 2025 ह्या धा म्हयन्यांच्या काळांत वट्ट एचआयव्ही लागण जाल्ल्या लोकां मदीं तरणाट्यांचो आंकडो चड आसा. ह्या काळांत गोंयांत 237 जाणांक एचआयव्हीची लागण जाल्या. हाचे मदीं 9 गुरवार बायलां सोडल्यार 228 मदीं 173 दादले, 54 बायलो आनी एक ट्रांसजेंडर हांचो आस्पाव आसा.
228 मदले 21 (9.2 टक्के) 15 ते 24 वर्सां पिराये मदले आसात. जाल्यार 84 (36.8 टक्के) 25 ते 34 वर्सां पिरायेचे आसात. ही म्हायती राज्य एड्स नियंत्रण संघटणे कडल्यान मेळ्ळ्या.
मेळिल्ले म्हायती प्रमाण, 2025 वर्साच्या पयल्या धा म्हयन्यांत वट्ट संसर्ग जाल्ल्या लोकां मदले 79 (34.6 टक्के) 35 ते 49 वर्सां पिरायेच्या गटांतले आसात. जाल्यार 2 संसर्ग जाल्ले लोक (1.2 टक्के) 14 वर्सां सकयले आसात. वट्ट 42 (18.4 टक्के) संसर्ग जाल्ले लोक 50 वर्सां वा ताचे वयले आसात.
वयल्या काळांत भलायकी खात्यान 1.26 लाख लोकांची चांचणी केल्या. एचआयव्ही पॉझिटिव्हिटीचे प्रमाण 0.19 टक्क्यां मेरेन उणें आशिल्लें. ह्या काळांत गोंयांत 7 एड्स दुयेंती सांपडले. तातूंत 5 दादले आनी 2 बायलो आसात.
हाचे आदीं संवसारीक एड्स दिसा निमतान आयोजीत केल्ले कार्यावळींत ह्या मळार बरो वावर केल्ल्या भलायकी केंद्रां आनी एनजीओचो भोवमान केलो. हे कार्यावळींत भलायकी सचीव यतीन्द्र मरळकार, डॉ. वंदना धुमे आनी हेर भलायकी अधिकारी हाजीर आशिल्ले. फाटल्या वर्साच्या तुळेंत गोंयांत अंदूं एड्स नियंत्रणांत आसा अशें मरळकार हांणी सांगलें. एड्स विशीं जागृताय निर्माण करपा खातीर राज्यभरांतल्या म्हाविद्यालयांनी 177 रेड रिबन क्लब सुरू केल्यात अशें तांणी सांगलें.
एचआयव्ही नियंत्रणांत गोंयचो देशांत चवथो क्रमांक
फाटल्या कांय वर्सांत गोंय एड्स नियंत्रण संघटनेन बरी कामगिरी केल्या. हाका लागून हे संस्थेक 2024-25त एचआयव्ही नियंत्रणांत देशांत चवथो क्रमांक मेळ्ळा. एचआयव्हीचेर नियंत्रण दवरपा खातीर सगळ्या नागरिकांनी यत्न करप गरजेचें आसा अशें डॉ. वंदना धुमे हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
