गोंयांत एचआयव्ही बाधीत वाडटात !

भांगरभूंय | प्रतिनिधी

भलायकी मंत्रालयान जारी केल्ल्या अहवालांत म्हायती

भांगरभूंय । प्रतिनिधी

पणजीः फाटल्या तीन वर्सां सावन गोंयांत एचआयव्ही बाधितांची संख्या वाडतूच आसा. फाटल्या पांच वर्सांच्या काळांत गोंयांतल्या 15,858 एचआयव्ही बाधितांनी राष्ट्रीय एड्स नियंत्रण कार्यावळी खाला (एनएसीपी) उपचार घेतल्यात, अशें भलायकी मंत्रालयान जारी केल्ल्या अहवालांतल्यान मुखार आयलां.

2019- 20 त गोंयांत 3,058 एचआयव्ही बाधीत दुयेंती सांपडिल्ले. 2020- 21 त तातूंत उणाव जावन ही संख्या 327 जाल्ली. ते उपरांत एचआयव्ही बाधितांचे संख्येंत वाड जायत रावली. 2021- 22 त ही संख्या 3,118 जाली. 2022- 23 त तातूंत आनीक वाड जावन ही संख्या 3,246 चेर पावली. 2022- 23 त तातूंत आनीक वाड जावन ही संख्या 3,246 जाली. जाल्यार पोरूं ही संख्या 3,409 इतली आशिल्ली.

ह्या पांच वर्सांच्या काळांत ज्या 15,858 एचआयव्ही बाधितांनी राष्ट्रीय एड्स नियंत्रण कार्यावळी खाला उपचार घेतले, तातूंत 8,036 दादले, 7,806 बायलो आनी 16 तृतीयपंथींचो आस्पाव आशिल्ल्याचें भलायकी मंत्रालयान जारी केल्ले आंकडेवारींतल्यान दिसता.

भलायकी मंत्रालयान गोंया सयत देशांतल्या सगळ्या राज्यांतल्या ह्या पांच वर्सांच्या काळांतल्या एचआयव्ही बाधितांचो आंकडो सादर केला. ते प्रमाण 2019- 20 त देशांत 13,80,128 दुयेंती सांपडिल्ले. 2020- 21 त 13,88,376, 2021-22 त 14,50,259, 2022- 23 त 15,74,316 आनी 2023- 24 त 16,88,925 जाणांक एचआयव्हीची लागण जाल्ल्याचें दिसता.

मजगतीं, गोंयांतल्या एचआयव्ही आनी एड्स बाधितांची संख्या उणी जावची, हे खातीर भलायकी खातें भलायकी मंत्रालयाचे मजतीन विवीध उपाय येवजण्यो आंखता. हे बाबतींत गोंयभर जागृताय करतात. तरी लेगीत एचआयव्ही आनी एड्स बाधितांची संख्या उणी जावपा बदला वाडतूच आशिल्ल्यान भलायकी ख्यात्या मुखार लेगीत आव्हान उबें जालां.