भांगरभूंय | प्रतिनिधी
पणजी: गोंयांत एक शिक्षकी शाळांचे संख्येंत 74 टक्क्यांनी उणाव जाला. 2023-24 वर्सा गोंयांतल्या 238 एक शिक्षकी शाळांनी 3,142 विद्यार्थी शिकताले. 2024-25 वर्सा 62 एक शिक्षकी शाळांनी 771 विद्यार्थी शिकताले. केंद्रीय शिक्षण खात्याच्या ‘युनिफायड डिस्ट्रिक्ट इन्फॉर्मेशन सिस्टम फॉर एज्युकेशन प्लस’ (युडीआयएसइ)च्या अहवलांतल्यान ही म्हायती मेळ्ळी. 2024-25च्या युडीआयएसइ अहवाल बिरेस्तारा जारी केलो.
वर्स 2024-25च्या अहवाला प्रमाण गोंयांत 1479 शाळा आशिल्ल्यो. हातूंत वट्ट 3 लाख 546 विद्यार्थी जाल्यार 15 हजार 196 शिक्षक आशिल्ले. एका शिक्षका कडेन शिकपी विद्यार्थ्यांचें प्रमाण 20 आशिल्लें. दरेक शाळेंत सरासरी 10 शिक्षक जाल्यार 203 विद्यार्थी आशिल्ले. 2024-25 मदल्या गोंयांतल्या सवी ते बारावी मेरेनचें सकल नोंदणी गुणोत्तर (ग्रॉस एनरोलमेंट रेशो) देशांत सगल्यांत चड आशिल्लो. जाल्यार मेघालय, मिझोराम आनी महाराष्ट्र ह्या राज्यांनी बालवाडी ते पांचवी मेरेनचें सकल नोंदणी गुणोत्तर चड आशिल्लें.
अहवाला प्रमाण 2024-25 वर्सा गोंयांत शुन्य प्रवेश आशिल्ली एकूय शाळा नाशिल्ली. तिसरी ते आठवी मजगतची शाळा सोडिल्ल्याचो दर 0.4 ते 0.8 टक्के इतलो उणो आशिल्लो. णवी ते बारावी मेरेन शिकपी विद्यार्थ्यां खातीर हो दर 8.1 टक्के आशिल्लो. चल्यां खातीर हो दर 10.9 टक्के जाल्यार चलयां खातीर 5.1 टक्के उरलो. पुराय देशांत अस्तंत बंगालांत शाळा सोडपाचो दर सगल्यांत चड म्हणल्यार 20.3 टक्के उरलो. उपरांत अरुणाचल प्रदेशांत 14.1 टक्के, जम्मू आनी कश्मीरांत 12.8 टक्के जाल्यार आसामांत 12.2 टक्के आशिल्लो.
21 टक्के सरकारी शाळांनी
चालू स्थितीतले संगणक
अहवाला प्रमाण 21.3 टक्के सरकारी शाळांनी संगणका वरवीं शिक्षण दिवपाच्या प्रणाली खातीर गरजेचे आशिल्ले चालू स्थितीतले संगणक आसात. अनुदानीत शाळेंत 94.3 टक्के जाल्यार खाजगी शाळेंत 93.6 टक्के संगणक चालू स्थितीतले आसात.
एका वर्सांत 9 सरकारी शाळा बंद
अहवाला प्रमाण 2023-24 वर्सा गोंयांत 789 सरकारी शाळा आशिल्ल्यो. 2024-25 वर्सा 9 शाळा बंद पडून 780 सरकारी शाळा उरिल्ल्यो. एका वर्सांत अनुदानीत शाळांची संख्या एकान वाडून 558 जाली. 2024-25 वर्सा गोंयांत 141 खाजगी विनानुदानीत शाळा आशिल्ल्यो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
