भांगरभूंय | प्रतिनिधी
पणजी : गोंयांत पियेवपाच्या उदकाची मागणी वाडत आसा. मात मागणे प्रमाण पुरवण जायना. सध्या गोंयांतल्या उदका प्रकल्पां वरवीं दिसाक 675 दशलक्ष लिटर (एमएलडी) उदकाची पुरवण करतात. मात गोंयची मागणी दिसाक सुमार 695 दशलक्ष लिटर इतली आसा. हाचोच अर्थ दिसाक 20 एमएलडी उदकाचो उणाव जाणवता. पेयजल खात्याक फाटल्या दोन वर्सांत उदका उणावा संबंदांत 3446 कागाळी आयल्यात. हाचोच अर्थ म्हयन्याक सरासरी 144 म्हणल्यार दिसाक सरासरी 5 कागाळी येतात.
मेळिल्ले म्हायती प्रमाण, खात्याक आयिल्ल्या कागाळींनी मुखेलपणान उदक नासप, उण्या दाबान उदक येवप, उदकाची पायपलायन फुटप वा गळटी लागप हांचो आस्पाव आसा. खूब खेपे वीज, गॅस, फोन, घाणयारें उदकाची पायपलायन घालपाच्या कामां मदीं धापको बसून उदकाची पायपलायन फुट्टा. कागाळ आयले उपरांत खात्या वतीन 1 ते 4 दिसांनी त्यो सोडयतात. गोंयांतल्यो खूबश्यो उदकाच्यो पायपलायनी पोरण्यो जाल्यात, त्यो बदलपाचें काम चालू आसा. तातूंत 8 ते 40 वर्सां पोरण्या उदकाच्या पायपलायनींचो आस्पाव आसा. तातूंत मुखेलपणान फोंडें, साश्टी, सांगें, केपें ह्या म्हालांतल्यो पायपलायनी आसात. गोंयांत सध्या 217.08 कि.मि. लांबायेच्यो उदका पायपलायनी बदलपाचें काम चालू आसा. जाल्यार फुडल्या वर्सा 3 ते 7 वर्सांत हेर पोरण्यो उदकाच्यो पायपलायनी बदलपाचें काम पांवड्या पांवड्यान हातांत घेतले. खात्यान फाटल्या दोन वर्सांत 30 हजारां परस अदीक उदकाच्या नमुन्यांची तपासणी केल्ली. तातूंतले फक्त 32 नमुने दुशीत सांपडले. ह्या काळांत ताळगांव सोडून हेर खंयच पेयजल दुशीत आशिल्ल्याची कागाळ येवंक ना. उदकाची मागणी पुराय करचे खातीर सरकारान नवे उदका प्रकल्प बांदपाचें काम हातांत घेतलां आनी ते बेगीन चालीक लागतले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
