गोंयांत उक्त्या प्रवर्गांतल्या कोयर कामगारांची संख्या चड

भांगरभूंय | प्रतिनिधी

पणजी: देशाचे तुळेन गोंयांत उक्त्या प्रवर्गांतलो कोयर वेंचक कामगारांची संख्येचे तुळेन चड आसा.

पुराय देशांत कोयर वेंचपाचें काम करप्यां मदीं एससी, एसटी, ओबीसी समाजांतल्या कामगारांची संख्या 84.86 टक्के आसा. जाल्यार उक्त्या प्रवर्गांतलो कोयर वेंचक कामगारांची संख्या 11 टक्के आसा. गोंयांत नोंदणी जाल्ल्या वट्ट कागारां मदीं 56.68 टक्के उक्त्या प्रवर्गांतले आसात. जाल्यार एससी, एसटी, ओबीसी समाजांतल्या कामगारांची संख्या 40.59 टक्के आसा. केंद्रीय समाज कल्याण आनी सक्षमीकरण खात्यान ही म्हायती जारी केल्या.

ते प्रमाण, केंद्र सरकाराच्या ‘नमस्ते’ उपक्रमा खाला देशभरांतल्या कोयर वेंचक कामगारांची म्हायती एकठांय करतात. ते प्रमाण, 23 जानेवारी 2026 मेरेन गोंयांतल्या 1286 कामगारांची म्हायती नोंद केल्या. हातूंत 796 दादले जाल्यार 490 बायलो आसात. वट्ट कामगारां मदीं 729 (56.68 टक्के) कामगार हे उक्त्या प्रवर्गांतले आसात. 192 एससी (14.94 टक्के), 178 एसटी (13.84 टक्के), 152 ओबीसी (11.81 टक्के) समाजांतले आसात. जाल्यार 35 कामगार (2.73 टक्के) हे हेर प्रवर्गांतले आसात.

मेळिल्ले म्हायती प्रमाण पुराय देशांत 1 लाख 52 हजार 801 कामगारांची म्हायती संकलीत जाल्या. हातूंत 78 हजार 374 दादले, 74 हजार 427 बायलो जाल्यार 12 तृतीयपंथी कामगार आसात. वट्ट कामगारां पैकीं एससी समाजांतले 92 हजार 89 (60.26 टक्के), एसटी समाजांतले 16 हजार 39 (10.49 टक्के), ओबीसी समाजांतले 20 हजार 954 (13.71 टक्के), उक्त्या प्रवर्गातले 16 हजार 329 (10.69 टक्के) जाल्यार हेर प्रवर्गांतले 7402 (4.85 टक्के) आसात.

कामगारां खातीर ‘नमस्ते’ उपक्रम

‘नमस्ते’ उपक्रमा खाला कोयरांत काम करपी कामगारांचें लींग, पिराय आनी हेर वैयक्तीक म्हायती घेतात. अशा कामगारांक वैधता मेळोवन दिवप तशेंच ह्या म्हायतीच्या आदाराचेर तांकां चड आनी बरे पद्दतीन केंद्रीय येवजण्यांचो लाव मेळोवन दिवप हे खातीर म्हायतीचो वापर करतात. कामगारां खातीर कामाचे सुवातेर सुरक्षीतताय तशेंच सन्मान मेळोवन दिवपा खातीर ‘नमस्ते’ उपक्रम सुरू केला.