भांगरभूंय | प्रतिनिधी
पणजीः गोंयांत विजेचेर चलपी गाडयो चार्ज करपा खातीर फक्त 137 चार्जींग स्टेशनां आसात. तशेंच चार्जींग सुविधेंत वाड करपा खातीर शार वाठारांत आनी म्हामार्गांचेर चार्जींग स्टेशनां उबारपा खातीर मार्गदर्शक तत्वां जारी केल्यांत, अशीं म्हायती केंद्रीय वीज मंत्रालयान दिल्या.
लोकसभेच्या पटलार लेखी जाप दितना केंद्रीय वीज राज्यमंत्री श्रीपाद नायक हांणी सांगलें, ब्युरो ऑफ एनर्जी एफिशियन्सी हांणी दिल्ल्या डॅटा प्रमाण देशभरांत 25,202 ईव्ही चार्जींग स्टेशनां आसात आनी तातूंतलीं 137 स्टेशनां गोंयांत आसात. विजे वयल्या गाडयां खातीर चार्जींग सुविधांची थापणूक आनी संचालन मार्गदर्शक तत्वां 2024 खाला गोंयांत ईव्ही चार्जींग सुविधा वाडोवपा खातीर कांय पावलां उखल्ल्यांत.
हातूंत गोंय सरकारान अधिसुचीत केल्ल्या शार वाठारांत 1 किमी चौखण मिटर वाठारांत उण्यांत उणें एक चार्जींग स्टेशन उबारपाचें, महामार्ग आनी मुखेल रस्त्याचेर दर 20 किलोमिटर अंतराचेर चार्जींग स्टेशन उबारप, चड रेंज आनी उच्च तांकीच्या गाडयां खातीर 100 किलोमिटर अंतराचेर म्हामार्ग तशेंच मुखेल रस्त्याच्या दोनूय वटांनी 240 किलो वॉट तांकीचीं दोन चार्जींग स्टेशनां बसयतले. येरादारी केंद्र वा बस डॅपो सारिकिल्ल्या वाठारांत शार वाठारांत ह्यो सुविधा उबरपा खातीर शार, शार उदरगत अधिकारी वा राज्यान सुवातो दाखोवन दिवच्यो, अशी जाप मंत्र्यान दिल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
