भांगरभूंय | प्रतिनिधी
पणजी : गोंयांत आशिल्ल्या केंद्र सरकाराच्या विवीध कार्यालयांनी थळाव्यांक रोजगार संद मेळना. हांगचे भरतींत बिगर गोंयकार तरणाट्यांक नोकरी मेळटा. हाका लागून थळाव्या तरणाट्यांचेर अन्याय जाता. राज्यांतले केंद्रीय भरतींत थळाव्यांकूच संद दिवची हे विशीं केंद्रीय मंत्र्यांक पत्र बरयिल्ल्याचें सांता क्रुझ गट कॉंग्रेसीचे अध्यक्ष जॉन नाझारेथ हांणी सांगलें. बिरेस्तारा पणजे जाल्ले पत्रकार परिशदेंत ते उलयताले.
ह्या वेळार मारियन आराऊजो आनी हेर वांगडी हजर आशिल्ले. जॉन नाझारेथ हांणी, फाटलीं कांय वर्सां टपाल खातें, राष्ट्रीयकृत बँको आनी राज्यांत आशिल्ल्या हेर केंद्रीय कार्यालयांत दुसर्या राज्यांतल्या लोकांची भरती करता. ह्या लोकांक कोंकणी समजना. हाका लागून जायतयो समस्या निर्माण जातात. टपाल खात्यांत महाराष्ट्रांतल्या लोकांची भरती केल्या. तांकां कोंकणी समजना. तशेंच तांकां थळाव्या वाठाराचें ज्ञान नाशिल्ल्यान जायत्या जाणांक तांचीं पत्रां वेळार मेळनात.
हे विशीं आमी केंद्रीय दळणवळण मंत्री ज्योतिरादित्य सिंधिया तशेंच अर्थमंत्री निर्मला सीतारामन हांकां पत्र बरयलां. ह्या दोनूय खात्यांनी गोंयांत भरती जावपाचें आसल्यार पंदरा वर्सां रावपाचो दाखलो आशिल्ल्या आनी कोंकणी समजपी मनशाकूच संद दिवची अशी मागणी आमी केल्या. गोंयांत दोन खासदार आनी एक केंद्रीय मंत्री आसात. तांणी हे विशीं यत्न करप गरजेचें. पोस्ट खात्यांत महाराष्ट्रांतल्या मनशांची भरती करप आडायना जाल्यार आमी पोस्टमास्टर जनरलाची भेट घेतले, अशी शिटकावणी नाझारेथ हांणी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
