भांगरभूंय | प्रतिनिधी
पणजीः उदेंतेक व्हांवपी वारें आनी हेर वातावरणीय बदलाक लागून गोंयांत आयज आनी फाल्यां पावस पडपाची शक्यताय हवामान खात्यान उक्तायल्या. दोन दीस जोगलां आनी गडगडा सयत मध्यम स्वरुपाचो पावस पडपाची शक्यताय आसा. ह्या दोन दिसां खातीर पावसाचो येलो अलर्ट जारी केला.
मुखेल पणान अस्तंत घांटा लागसारच्या वाठारांनी पावस पडपाची शक्यताय आसा. 20 ते 24 मार्च मजगतीं राज्यांतलें वातावरण सुकें उरपाची शक्यताय आसा.
बुधवारा पणजे चडांत चड 33.5 अंश जाल्यार उण्यांत उणें 24 अंश सेल्सिअस तापमानाची नोंद जाली. मुरगांवां चडांत चड तापमान 32.8 अंश आनी उण्यांत उणें तापमान 23 अंश सेल्सिअस उरलें. फुडले स दीस राज्यांतले चडांत चड तापमान 33 ते 34 अंश जाल्यार उण्यांत उणें तापमान 24 ते 25 अंश सेल्सिअस मेरेन उरपाची शक्यताय हवामान खात्यान उक्तायल्या.
ह्यान पयलीं खात्यान मार्च, एप्रिल आनी मे ह्या तीन म्हयन्यांच्या काळांत गोंयांत चडांत चड आनी उण्यांत उणें तापमान सरासरी परस चड उरपाची शक्यताय उक्तायल्या. वयल्या काळांत राज्यांत सरासरी इतलो वा ताचे परस मात्सो उणो पावस पडपाची शक्यताय खात्यान उक्तायल्ली.
मजगतीं, फाटल्या वर्सा मार्च म्हयन्यांत गरमी वाडिल्ली. खात्यान 1 ते 10 मार्च 2025 मजगतीं उश्णतायेचो येलो अलर्ट जारी केल्लो. अंदूं उश्णताय तुळेन उणी आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
